Textbase
Return to list of source texts
Croniques de London depuis l'an 44 Hen III jusqu'à l'an 17 Edw III
Edited by G.J. Aungier
London, Camden Society 1844
Genre: Chronicles
AND Bibliography: Cron Lond1
This is a digitised partial version of an original work in the public domain. See General Conditions of the Anglo-Norman On-Line Hub for rights information concerning this electronic version
Page i
INTRODUCTION
THE Manuscript from which the following Chronicle of London has been transcribed forms the latter portion of a small parchment book in octavo, preserved among the Cottonian Manuscripts (Cleopatra, A vi), and commences at folio 54. It is written in the old Norman French, and from the handwriting appears to have been compiled about the middle of the fourteenth century, but unfortunately no clue exists by which the name of the writer can be ascertained. The period which it embraces is from the 44th of Henry III to the 17th of Edward III., and at the commencement of each year are recorded the names of the mayors and sheriffs of London.
Page 1
CRONIQUES (DE) LONDON
DEPUIS
L'AN 44 HEN. III JUSQU'À L'AN 17 EDW. III.
44 HEN. III.
xliiij
WILLIAM fitz Richard, meir. Henri de Coventre et Adam Broning, vicountes.
En cele an furent deux Romeins occys en Westchepe, c'est à savoir, mestre Johan le Gras et Beisantyn, par gentz estraunges. Cele an moveit un descord parentre Sire Edward et le Counte de Gloucestre Richard, pur quey le[s] portes de Loundres furent fermez et gardez de gentz d'armez bien cynk semeygnes et plus, pur çeo qe le Roy fut outre mer pur acorder ove le roy de Fraunce.
xlv
Le dit William, meir. Johan de Norhamtone et Richard Pikard, vicountes.
Page 2
En cele an, le nuit seint Johan dedeinz Nowel, eschaperent hors de Neugate Roger de Clere, Geffrey de Toucestre, Johan de Seint Auban, Johan de Everwik, et treis autres, e pur cele eschap fu Roger le gaoler pris et enprisonné en Neugate.
xlvi
Le dit William, meir. Phelip le Tailour et Richard de Walbrok, vicountes.
xlvij
Thomas fitz Thomas, meir. Robert de Mounpelers et Hubert de Suffolk, vicountes.
En cele an comensa la guerre entre le roy et ses barouns pur les purveaunces d'Oxenford. Adonk fu pris l'evesk de Hereford par les barouns. Cele an fut la novele sale de Weimouster ars.
Page 3
Cele an fut la reyne vileinement escriré et ledengé à le Pount de Loundres, sicome ele voleit aler del Tour à Weymouster, pur ce qe ele avoit fait occire une gentile damoysele, la plus bele qe homme savoit, et luy mist sure qe ele estoit la concubine le roy. Par quey la reyne luy fist prendre et despoiller tut nue, et luy fist seer entre deus grauntz fues en une chaumbre mult ferm clos, si qe la tresbele damoysele estoit mult espountée, qar ele quidoit bien daver estre ars, si comenza graunt deol demesner. Et endementers la roygne avoit fait faire une baigne, si fist la bele damoisele leinz entrer, et meintenaunt fist une mauveise vielle ferir la bele damoisele ove une launce en ambe deus les bras, et si tost come le saunk hors sailist vint une autre escomengée sorceresse, si porta deus horribles crapaudes sure un troboille, si les mist sure les mameles au gentile damoisele, et taunttost seiserent les mameles et comenserent à leiter. Et deus autres vielles tindrent ses braz estendues, qe la bele damoisele ne poeit en l'eawe avaler, taunqe tot le saunk q'estoit en son corps fust hors curru. Et totdis les ordes crapaudes les mameles de la tresbele damoisele leterent, et la roygne riaunt totdis le moka, et out graunt joye en queor, qe ele estoit ensy vengée de Rosamonde. Et quaunt ele fu morte, si fist prendre le corps et en une orde fossée enterer, et les crapaudes oveske le corps. Mais quaunt le roy avoit entendu les noveles, coment la roygne avoit faite de la tresbele damoisele q'il taunt ama et taunt chiere avoit en queor, graunt deol demesna et graunt
Page 4
lamentacion fist: "Allas! dolent! qe fray pur la tresbele Rosamonde? qar unkes son pierre ne fust trovée de beaute, naturesse, et cortesie." Et quaunt lungement avoit fait tiele lamentacion, il voleit savoir où le corps de la bele damoisele fust devenu. Lors fist le roy prendre une des mauveises sorceresses, et la fist mettre en graunt destresse, pur luy counter tot la verité come avoyent fait de la gentile damoisele, et jurra par Dieu omnipotent qe si nul parole mentit qe ele avera auxint vile jugement come homme purra ordeiner. Lors comenza la vielle à parler et counter au roy tot la verité, coment la roigne avoit fait de la tresbele corps au gentil damoysele, et où e en quele lieu l'en la troveroit. Et endementiers la roygne fist prendre sus le corps de la tresbele damoisele, et comaunda amener le corps à une mesoun de religioun qe aad a noun Godestowe près de Oxenford à deus luwes, et illoqes le corps Roseamond enterer pur colurer ses mauveise faitz, si qe nully aparcevereit les ordes et trop vileines faitz qe la roygne avoit fait, et de ele excuser de la mort la tresgentile damoisele. Et lors le roy Henry comensa de chivacher vers Wodestoke là où Rosamonde q'il taunt ama en queor estoit si trecherousment murdriz par la roigne. Et sicome le roy chivacha vers Wodestoke, si encountra le corps mort de Rosamounde enclos fortement dedeinz une ciste bien et fortment liée de fer. Et le roy meintenaunt demaunda quey corps çeo estoit, et quele noun avoit le corps mort q'ils amenerent. Lors luy respondirent qe çeo estoit le corps la tresbele Rosamond. Et quaunt le roy Henry çeo oyist, si comaunda erraument de overir le cyste q'il purreit veer le corps qe si vilement estoit martirée. Lors meintenaunt firent le comaundement le roy, et luy mostrerent le corps Rosamond, qe estoit si hidousement mis à mort. Et quaunt le roy Henri vist tot la verité, pur graunt dolur à tere paumist et lungement jeust en traunce avant qe homme poeit avoir parole de luy. Et quaunt le roy reveilla de son paumysoun, si dist et jurra à graunt serment, qe bien se vengereit de la très orde felonie qe au gentile damoysele fu faitePage 5
par graunt envie. Lors comensa le roy à waymenter et graunt deol à demener pur la tresbele Rosamounde, q'il taunt ama en queor. "Allas! dolente!" fist il, "douce Rosamonde, unkes ne fust ta pere, si douce ne si bele creature ne fust unkes trovée: ore douce dieux qe meint en trenite, del alme douce Rosamonde en eyt mercy et luy pardoint touz ses meffaitz; verray Dieu omnipotent, qe estes fyn et comensement, ne suffrez jà l'alme en nul horrible peine estre perii, et luy doigne verray remissioun de touz ses pecchez, pur ta graunt mercy." Et quaunt çeo out pryée, il comaunda meintenaunt de chivacher avant droit à Godestowe ove la corps de la meschyne, et là fist faire son sepulture en ceste religiouse mesoun de nonaynes, et illuqes ordeina tresze chapeleins à chaunter pur l'alme la dite Rosamonde taunqe le siecle dure. En ceste religious mesoun de Godestowe, vous die pur verité, gist la bele Rosamonde ensevely. Verray dieux omnipotent de s'alme en eit mercy. Amen.xlviij
Thomas Fitz-Thomas, meir. Gregori de Rokeslé et Thomas de la Forde, vicountes.
En cele an, la quarte ide et la quinte ide d'Averil, fut l'occision des Jues en Loundres. Mesme l'an, le vj. ide de Maij, fut le graunt arsoun en Westchepe de Milkstrete et de Bredstrete.
Page 6
Et l'endemeyn fut le bataille de Lewes, s'est à savoir le meskerdy prochein devant le feste seint Donston. Cele an fut veu el firmament une esteile q'est apellé comete. Adonk furent les grauntz arsouns en Engeltere, et Istelworthe fut ars, et la Juerie destrut.xlix
Le dit Thomas, meir. Edward le Blount, draper, et Piers Aunger, vicountes.
Cele an furent grauntz toneires en Engeltere, et par un toneir fut un partie abatu del clocher seint Berthelmeu en Loundres.
Page 7
En cele an, le jour del goule d' Aug[u]st, furent partie des barouns qe tindrent ove les purveaunces d'Oxenford pris à Keningworthe en la companie Simon de Mountfort le joevene, et le Mardi prochein après fust la bataille de Evesham, la veille de seint Oswold.l
Sire Hugh fitz Otes fu fait gardein de Loundres, et le meir et les viscountes abatuz par .v. anz, pur çeo qe le cyté tint ove les barons. En cele an fust Estevene Bokerel, Thomas de Penleslond, Michel Thony, orfeverer, Johan le chapeler de Flete, et autres furent maundez par la lettre le roy Henry qe ils venissent à luy à Wincestre, et si tost come ils furent venuz le roy comaunda q'ils fussent mis en prisoun, et le roy les dona à sire Edward son fitz, et il les detint en prisoun chescun par soy jesk atant qe ils fussent reintz, par quei ils donerent graunt avoir à sire Edward issint q'ils fussent deliverez, et partie de lour teres
Page 8
avoit sire Edward doné as chivalers de la tere en desheriteson de eux et de leur heirs pur touz jours, si ils ne rechatassent de lour argent.li
Willeam fitz Richard, gardein. Johan Adrian et Wauter Hervi, bailiffs. Et celuy William fitz Richard ne fut gardein par le roy fors de la feste seint Martyn desk le jour de l'assencion. Et adonk furent fait les ditz Johan Adrian et Wauter Hervi, bailifs, de souz sire Johan de la Lynde et sire Johan Walravene, qe adonk fut constable de la Tour, jeskes à le seint Michel. En cele an le jour de la seinte Croiss en August fit sire Edward Trayner, Gerveys Skyret, qe fut pris hors del cymitere seint Sepulchre pur la mort Giles de Wodeham, par quei mestre Godefrey de seint Donston, fut en graunt persecution pur le fraun
Page 9
chise de seinte esglise. Mesme l'an, après la Trinité, comensa le siege de Kilingworth, et se tint jesk le jour seinte Lucye prochein suiant qe le chastel fu rendu. Mesme l'an, entour la seint Mychel, conquirent les desheritez l'ille de Ely.lij
Uncore ne fut nul meir en Loundres, mès Johan Adrian et Lucas de Batencourt bailifs desoutz sire Johan de la Linde. Mesme l'an, le lundy devant la chaundelure, se remua le roy de Weimouster jesk à Waltham, d'aler à seint Esmon pur asseger l'iglle de Ely.
liij
William fitz Richard, gardein. Wauter Hervy et William de Durham, bailiffs.
En mesme le moys, al parlement à Wincestre, furent Phelip le Tailour et Wauter le Porter faitz viscountes. Et par assent des prelatz, countes, et barons, lessa le roy sa croisse à sire Edward son fitz, qe il alast atant pur luy come pur luy mesmes en la tere seinte, et luy graunta le xxd. qe fut coillé en Engeltere. Et après le .xx. jour d'Aust, il et sa femme et moutz des grauntz seignours de la tere passerent croissez la mer à Dovere. Et adonk furent remuez Wauter et Phelip de lour
Page 10
viscountes, et furent fait viscountes par les cytezeins Gregorie de Rokeslé et Henry Waleis.liiij
Sire Hugh fitz Othom, gardeyn. Thomas de Basingges et Robert de Cornhill, bailifs.
lv
Sire Hugh fitz Othom, gardein. Wauter le Porter et Phelip le Tailour, viscountes.
lvj
Johan Adrian, meir. Gregorie de Rokeslée et Henri le Waleis, vicountes.
Page 11
Cele an cheit le clocher des Arches à tere.
lvij
Wauter Hervy, meir. Johan de Bodelé et Richard de Parys, cordewaner, vicountes.
Le quele Wauter Hervi fu fait meire par election del comune countre le volunté des aldermans. Si demorra meir l'autre an suyaunt. En cele an morust le roy Henri le jour seint Esmon
Page 12
de Pounteneye, et le jour seint Esmon le roy fut ensevely à Weymouster. Et si tost come l'enterement fu fait, sire Gilbert de Clare counte de Gloucester et touz les autres grauntz d'Engletere firent feauté et homage à sire Edward fitz à roy Henri, q'estoit a l'houre en la tere seinte en pelerinage, come avant est dit.EDWARDUS PRIMUS.
Les nouns des meirs e les merveiles en le temps le Roy Edward le fitz le Roy Henry.j
Wauter Hervy, meir. Johan Horn et Wauter le Porter, vicountes.
ij
Henri Waleis, meir. Henri de Coventré et Nicholas de Wincestre, vicountes.
En cele temps, par Henri Waleis, fut Wauter Hervi deposé
Page 13
de sa aldermanrie. Cele an vint le roy Edward de la tere seinte et sa femme, et furent coronnez à Weimouster le dimaygne prochein après la feste de l'assumpcion nostre dame, la feste seinte Magne, et le conduit en Chepe ala tot le jour de vin vermail et vin blaunk à boire à qi qe voleit.iij
Gregorie de Rokeslé, meir. Lucas de Batencourt et Henri de Frowik, vicountes.
Page 14
En mesme l'an fut Adam de Bekke, chanon del esglise seint Pole, occys devant la veiglle seint Andreu. Et en cele an, le samady prochein devant la fest seint Bartholmeu, eschaperent presons hors de Neugate. Mesme l'an, as outaves de seint Martyn, sistrent justices errauntz à la croisse seint Piere, c'est à savoir mestre Roger de Seton, Johan de Cobham, et Salamon de Roucestre.
iiij
Gregori de Rokeslé, meir. John Horn et Rauf de Blount, orfevere, vicountes.
En mesme l'an fut Michel Thoni le joevene pendu pur articles d'occisions et de robberies, qe les aldermans mistrent sure.
v
Gregori de Rokeslé, meir. Rauf d'Arras et Rauf le Fevre, vicountes.
Cele an le veile de seint Vincent, sire Johan Lovetot et sire Roger Loveday sistrent à le mesoun Johan le fitz Johan, pur espurge ceux qe furent enditez par .xij. gardes des articles de larcines et de rescet et de rotundurs de la monée, et ne furent dampnez qe .iij., .j. homme et .ij. femmes. Cele an ala le roy en Wales ove son poair, et la cité de Loundres l'envoya cent arblasters.
vj
Gregori de Rokeslé, meir. Johan le fitz Johan Adrian et Wauter le Cornwaleis, vicountes.
En cele an fut le meir presenté à la tour de Loundres à sire Auntoigne de Bek, et ressu de par le roy, et là fit il le serment.
Page 15
Et le meir ressut les viscount en la Gildhall, par le comandement le roy, pur eux esparnier q'ils ne alassent en Gales. En mesme l'an Lewlyn se rendi au roy, et luy dona pur sa pes avoir .l. mil mars d'esterling, et fist serment sur seintz de venir chescun an deux foithe al parlement le roy; et lors Leulyn esposa la figlle sire Simond de Mountfort, et cele an le dit Leulyn fit son homage au roy.vij
Gregori de Rokeslé, meir. William le Mazener et Robert de Basinge, vicountes.
Cele an les .iij. engins furent faitz à le Tour. En cele temps vint le roy d'Escoce à Loundres al parlement le roy de an en an, et si avoit ses habitacions mult honeste à sa demoer par entre les courtz le esveske de Cycestre et le counte de Lancastre q'est apellé Saveye, hors de la barre au temple novelle. En mesme l'an, as outaves de seint Martin qe fut par venderdi, ainz tierce, furent touz les Jues d'Engeltere pris pur la monoye qe fut vilement rotundu et fause, et à la feste seinte Lucye après touz les orfeveres de Loundres et touz ceux de la chaunge et moutz des bones gentz de la vile furent pris pur l'achat de plates, et pur la chaunge de grosse moneye pur menue, q'il furent enditez par les gardes. Et le lundi prochein après le tiffanie, sistrent justic. à le Gildhall pur faire
Page 16
la deliveraunce, c'est à savoir, sire Estevene de Pevencestre, sire Wauter de Helyon, et sire Johan de Cobham, et ceux q'il voleient à eux assocyer, pur le quele fet furent .iij. Crestienz .cc. iiijxx. et .xiij. Jues treinez et penduz pur retundre del moneye. Mesme l'an comencerent les freres prechours de Loundres le fondement de lour novele esglise à Chastel Baynard, et frere Robert de Kilwardby, ercheveske de Caunterbure, fu maundé par le apostoile pur estre cardinal. Et frere Johan de Pekham, qe fut frere menour et cardinal, fut maundé en Engeltere pur estre ercheveske de Caunterbury sacré en la court de Rome. Mesme l'an fut la rounde table a Kylingworthe. CelePage 17
an fut le graunt arsoun à seint Botolf. Cele an fut le chaunge levé de la novele moneye esterling, maile et ferzing, à le tour de Loundres, et Gregori de Rokeslé mestre de la chaunge par tot Engeltere. Cele an fut fu le morage levée le .xiiij. jour de Feverer en Loundres à durer par .iij. anz, mès çeo ne fut pas pris devant la mi-quarreme.viij
Gregori de Rokeslé, meir. Thomas Box, et Rauf de la More, vicountes.
Mesme l'an mestre Johan de Chishull, evesk de Loundres, morust.
ix
Gregori de Rokeslé, meir. William de Farendon et Nicholas de Winchestre, vicountes.
x
Henry Waleis, meir. William Mazener et Richard de Chikewell, vicountes.
Page 18
Mesme l'an despessa le pount de Loundres par le graunt glace qe survint. Mesme cele an fit le meir primes peiser le blé vers le molyn et la farine, et il fit purveyer la claye pur trere sus les pestours.
xj
Henry Waleis, meir. Wauter le Blount et Angecelin de Betevile, vicountes.
Cele an fu Leulyn prince de Wales pris et descolé, et sa teste maundé à la tour de Loundres; et sire Edward fitz le roy Edward fut adonk né, le jour de seint Mark.
xij
Henri Waleis, meir. Martyn Box et Jordan Godchep, vicountes.
En cele an fu Davy le frere Leulyn trayné, pendu, et descolé, et sa teste maundé à le tour de Loundres. En mesme l'an pur la mort Laurence Duket, qe fut pendu en le esglise Nostre Dame des Arches, furent vij treinez et penduz, c'est a savoir,
Page 19
Renaud de Lanfar, Robert Pinnot, Poul de Stybbenheth, Thomas Coronner, Johan de Tholosane, Thomas Russel, et Robert Scot; et une femme Alice atte Bowe estoit ars pur mesme le fet; et Rauf Crepyn, Jordan Godchep, Gilbert le Clerk, et Geffrey le Clerk, furent atteintz de la felonye, et remistrent prisons en la tour.xiij
Gregori de Rokeslé, meir. Estevene de Cornhill et Robert de Rokeslé, vicountes.
En cele an, le jour seint Peter et seint Poul, fut la cyté de Loundres pris en la meyn le roy, pur çeo qe Gregory de Rokeslé rendi sus le seal à Berkingchirche, et le bailla à Estevene Esshwy.
Page 20
xiiij
Sire Rauf de Sandwyz, gardein. Wauter le Blount, pessoner, et Johan Wade, vicountes.
Page 21
En cele an passa le roy en Fraunce al parlement, pur fere acord entre trois roys.
xv
Sire Rauf de Sandwyz, gardein. Thomas Crosse et Wauter Hautein, vicountes.
En cele an furent touz les Jues d'Engeltere pris et enprisonnés, et mis à raunsoun, l'endemeyn seint Phelip et Jacob.
xvj
Le dit sire Rauf, gardein. William de Hereford et Thomas de Stanes, vicountes.
xvij
Sire Johan de Bretton, gardein. William de Betaigne et Johan de Caunterbury [vicountes].
Mesme l'an fu le dit sire Johan de Bretton ousté, et le dit sire Rauf fu fait gardein come avaunt, et adonk revint le roy de la outre.
Page 22
xviij
Sire Rauf de Sandwyz, gardein. Fouke de Seint Esmon et Salamon Coteller, vicountes.
Mesme l'an furent touz les justices pris et mis à raunsoun pur lour tresoun. Tost après le darrein dimeyngne d'Averil esposa le counte de Gloucestre dame Johane d'Acres la fille le roy à Weymouster. Mesme l'an esposa Johan fitz le duk de Braban Margaret sa autre fille. Et après çeo fut purveu par le roy et son conseil par priere de l'apostoile, qe touz les Jues d'Engletere furent mis en exil del goul d'Aust jesk à le fest de touz seintz, sur peine de capitacion, si outre cele feste ascun d'eux fut trové en Engeltere.
Mesme l'an un sire Thomas de Weyland, justice, forsjurra la tere pur sa fausine. ‖ [‖] See Appendix I.23
xix
Sire Rauf de Sandwyz, gardein. Thomas Rumeyn et William de Leyre, vicountes.
En cel an, la veille seint Andreu, morust Alianore la femme le roy Edward, et gist à Weimouster. Et en cel an morust la
Page 23
reine la miere sire Edward, et gist à Aumesbury, et le lundi prochein devant le seint Nichole fut son quer enterré à les frere menours à Loundres.xx
Sire Johan de Bretton, gardein. Rauf le Blount et Hamond Box, vicountes.
Mesme l'an à le Pasche moveit le roy vers Escoce. En cele temps les Normantz vindrent nutauntre come leres ove graunt navie, et ariverent sus pres l'ermitage à Dovere, et robberent et arderent grantz partie de la vile.
xxj
Sire Rauf de Sandwiz, gardein. Henri le Bole et Elys Russel, vicountes.
En cele an fut la descord fait entre le roy d'Engeltere et sire Johan le Bailliol, et adonk fut il fait roy d'Escoce. Cele an furent les destres poyngz de .iij. hommes coupés pur la bascle. En cele an fu sire Rauf de Sandwyz ostez, et fu fait gardein sire Johan de Brettone. En cele an moveit le descord entre les portz et les Normantz et les portz conquirent graunt navie.
xij
Sire Johan le Breton, gardein. Robert de Rokeslé et Martyn de Aumesbury, vicountes.
Cele an vint le roy d'Escoce à Loundres al parlement. Mesme l'an sistrent les justices errauntz à la croisse de piere.
xxiij
Sire Johan le Breton, gardein. Richard de Gloucestre et Henri Box, vicountes.
Page 24
Mesme l'an conquistrent les portz graunt navie d'Espaigne. En cele an vint un si graunt flod en Tamyse, q'il noea grauntz partie des teres de Bermundeseye et de tut le pais entour, q'est ore apele le breche.
xxiiij
Sire Johan le Breton, gardein. Johan de Dunstaple, et Adam de Hallingbury, vicountes.
Mesme l'an morust sire Gilbert de Clare, counte de Gloucestre. Et si estoit adonk mewe une gere entre sire Johan Baillol roy d'Escoce et le roy d'Engeltere. En mesme l'an conquist le roy la tere de Gales et la tere d'Escoce. Et fu pris sire Johan Baillol roy d'Escoce, et Johan le joevene Comyn, et autres barounes et chivalers d'Escoce, et furent touz maundez à le tour de Loundres. En mesme l'an fut Thomas de Turbeville, chivaler, treyné et pendu pur lettres de tresoun. § [§] The plans of this traitor, and their failure, are well told in a series of interesting contemporaneous documents printed in the Appendix (II) to which the reader is referred.25 En cele temps fut le bataile de Dunbarre, et furent occys d'Escoce .xxvj. mil. .ccc., et nul homme des Engleis de renoun, fors sire Patrik de Graham; et si furent pris à l'houre d'Escoce .iij. countes, .vij. barounes, .xxviij. chivalers, xj. clerks, et .xiii. pilardes, et furent fiergez et maundez à la tour de Loundres.
Page 25
xxv
Sire Johan le Breton, gardein. Adam de Fulham et Thomas de Suffolk, viscountes.
xxvj
Henry Waleis, meir. Johan de Storteford et William de Storteford, vicountes.
Mesme l'an le roy Edward prist le serment de les Escoce à Weimouster, qe jammès ne duissent relever encountre Engeltere, ne armes porter encountre luy, c'este à savoir, sire Johan le Comyn, le counte de Stratherne, le counte de Carryk, .iiij. evesqes et deus abbés pur tote la clergie d'Escoce, et issint passerent quites en lour paiis. Mais nepurqaunt en mesme l'an les Escoces entrerent en Engeltere, et robberent en Northumberland, et firent un shivaldour William Waleis lour cheventein. Et adonqes le counte de Garenne, sire Henry Percy, sire Willeam Latimer, et sire Hughe de Cressingham, donqes tresorer, enchacerent après William Waleis, et pristrent le chastel de Strivelyn, et le matyn prochein nos gentz bien à .vj.
Page 26
myls issirent hors pur doner bataille à le dit William Waleis; et le dit William Waleis ove son poer enchasa nos gentz arere deske à le pount de Strivelyn, et la fut sire Hughe de Cressingham, tresorer, occis et graunt partie de nos gentz.xxvij
Henry Waleis, meir. Richer de Refham et Thomas Saly, vicountes.
En cele an la veille del Tiffaine fut la terremote. En cele temps esposa le roy Margarete la soer le roy de Fraunce.
xxviij
Elys Russel, meir. Johan Darmentiers et Henry de Fingry, vicountes.
Page 27
En cele temps furent les pollards mis pur maille la veile de Nowel, et à la Paske après furent defenduz par tot. En cele temps fu graunt partye gaygné de la tere seinte par le roy de Tars, en le mois de Jenever, et en Mars l'an de grace m. cc. iiijxx. xix.; et le jour de la Maudeleyne prochein aprés fu la bataille feru à Foukirke, si furent occis d'Escoce .lvij. mil. ccc. xvij. et un vailant chivaler Engleis, un hospitler, qe avoit à noun Bryan Jay, sicome il pursuit après William Waleis, qe se mist à fuite, le dit chivaler ferist son chival des esporunes, et son chival saillist en un mire perfounde, et quaunt William Waleis çeo vist si se retourna et luy occyst.
x [x] anno domini Mo. ccc.28xxix
Elys Russel, meir. Lucas de Haveringge et Richard de Chaumps, vicountes.
En cele an, à le Chaundelure, fut le parlement à Nicole, et la fu fait sire Edward fitz le roy prince de Gales et counte de Cestre. En cele temps fut le counte d'Artois et .iiij. autres
Page 28
countes, et poeple saunz noumbre, tuez par Piers Conow de Flandres. Et mesme l'an le roy Edward fist un retourn en Escoce, et vint al chastel de Strivelyn qe fust bien estorée des gentz et de vitaile pur .vij. aunz, et le roy ne poeit riens faire taunt fust le chastel fort et bien defendu. Et adonkes le roy comaunda de lever sus deus fourches de .lx. piés en haut devant les portes du chastel, et jurra graunt serment qe qaunqe furent en le chastel, fust il counte, baroun, ou chivaler, haut ont bas, s'ils ne rendrent le chastel le plus tost, q'ils serront treinez et penduz sur les fourches, saunz nul mercy de luy aver. Et quaunt ceux dedeinz oyerent çeo, tost overerent les portes, et se respondirent au roy, et le roy les pardona son mautalent. Et adonkes touz les graunt d'Escoce firent lour serment de venir chescun an à Weimouster à son parlement, et de ester à sa ordenaunce.xxx
Johan le Blount, meir. Piers de Bosenho et Robert le Callere, vicountes.
En cele an le counte marchal et le counte de Herforde feofferent le roy de lour terres et tenementz, et le roy en seysine xl. jours. Le roy refeoffa les deux countes à eux et à lour heirs de lour corps engendrez, et si nul heir ne ussent, turner ariere au roy et à ses heirs. En cele an vint le eschekkere de Everwyk. Et mesme l'an, quaunt la guerre fu sessé et finie en Gales, Escoce, et Gascoygne, pur restorer ses grauntz despence fait par xx. aunz devaunt, fist justice fer sur mau
Page 29
fesours, et fust apellé Traylebastoun, et par ceo le roy gaygna graunt tresor, et par icele justicerie les communes de la tere furent en greindre equité par deux anz entiers par my tot Engeltere.xxxj
Johan le Blount, meir. Symond de Parys et Hugh Pourte, vicountes.
En cele temps fut le tresorie le roy debrusé à Weimouster.
Page 30
xxxij
Johan le Blount, meir. John de Boreford et William Coumbemartin, vicountes.
En cele temps sistrent justice sire Roger Brabason et sire William de Bereford, pur enquere qe avoit debrusé la tresorie le roy à Weimouster.
xxxiij
Johan le Blount, meir. Johan de Nicole et Roger de Paris, viscountes.
En cele temps fut William Waleis pris en Escoce, et mesné à Loundres le jour de seint Dominik, et jugement doné countre luy q'il fut trainé, pendu, descolé, ses boels ars, et son corps departy en iiij. quarters, et sa teste ficché sure le pount de Loundres la veile seint Berthelmeu.
Page 31
xxxiiij
Johan le Blount, meir. Reinaud de Tunderlé et William Cosyn, vescountes.
En cele an, le jour del Pentecost, sire Edward fitz le roy Edward fu fait chivaler, et iiijxx. et xij. chivalers fait pur reverence de luy; et le dit Johan le Blount, meir, fu fait chivaler mesme le jour. En cele temps fu Simond Frisel treiné, pendu, descolé, ses boeles ars, et le corps saunz teste pendu autre
Page 32
foithe et gardé de nuit, et mesme le jour furent ij. chivalers d'Escoce descolez à le tour de Loundres. Et mesme l'an l'esvesqe de seint Andreu, sire Robert le Brus, le counte de Carrik, et touz les autres barounes d'Escoce, furent oblygez par serment et par autre affiaunce à Weimouster, qe jammès ne mesprendrent vers Engeltere, sure peine d'estre desheritez et perdre vie et membre, et sur ceste affiaunce ils alerent saufz en lour pais. En cele temps, en un nuit et un jour, seinte esglise par tot Engelterre fut robbé de tut le tresor qe leinz fust trové par le roy Edward. Et tost après les Escoce firent par election Robert le Brus lour roy; mès sire Johan le Comyn ne voleit à ceo en nule manere assenter à son corounement, par quey Robert le Bruss luy occist en l'esglyse des frere menours à Dounfrys, et puisse après à l'assumpcion nostre dame le roy Edward fist un chivachée en Escoce, et prist la ville seint Johan, et encountre sire Robert le Bruss et sa companye, des queux furent occys xxiiij. mil, cc. xvij. d'Escoce, et sire Robert Bruss s'enfuist. A cele bataile estoit pris l'eveske de Glascou, l'eveske de seint Andreu, l'abbé dePage 33
Skone, et autres, en fers bien armés come treitres encountre lour serment, et furent presentz al roy Edward; mès il ne voleit eux mettre à juyse pur çeo q'ils estoyent prelat; mès les fit garder touz armez taunqe le roy eust maundement de apostoile quei serreit à faire de eux.xxxv
Sire Johan le Blount, chivaler, meir.
Edmond Bolet et Geffrey del Conduit, vicountes.
En cele temps fut le counte d'Atheles pendu et descolé à Loundres. En cele temps furent les ij freres Robert Bruss pris en Escoce et penduz. En cele an, le xvj jour d'Averil, fut sire Johan Waleis le frere William Waleis pendu et descolé. En cele temps morust dame Johane d'Acres, contesse de Gloucestre, et adonke morust le roy Edward en les parties d'Escoce le venderdi en le fest del translacion seint Thomas de Canterbury, et fut son corps amené à Weymouster la veille de l'assumpcion nostre dame.
EDWARDUS SECUNDUS.
Les nouns de meirs et viscountes et autres merveiles en le temps le roy Edward Secunde.i
Sire Johan le Blount, chivaler, meir.
Page 34
Nicholas Pycot et Neel Druerye, viscountes.
En cele an, le venderdi apres le fest de seint Luke, fut le roy Edward ensevely noblement à Weimoster. En cele temps furent les Templers destruz. En cele an, le dimeygne après la feste seint Piere in cathedra, furent le roy et la reyne, dame Isabele, corounez, à quele corounement fut sire Johan Bacwelle, chivaler, tué, sicome il cheit de un mur. En cele an fut graunt maladie des oelz, dont plusours gents perdirent le veue.
ij
Nicholas de Farndon, meir.
Jakes le Botiller et William de Basinge, vicountes.
Page 35
iij
Thomas Romeyn, meir.
Roger Palmere et Jakes Fouke, vicountes.
En cele temps vint sire Piers de Gaverstone en Engeltere, qe fut exilé par le roy Edward conquerour, et fu fait counte de Cornewaille à graunt damage de tot le realme. En cele an fut si graunte glace en Tamyse qe moutz des gentz passerent à pié sure le glace jeske à Suthwerk, et arere à Loundres. En cele an fut doné jugement à Weimouster countre la fraunchise, sure le purchaz de bastardrie, si ascun fut mort saunz heir et saunz testament fait, ses teres et tenementz dusent estre eschet au roy.
iiij
Richer de Refham, meir.
Symond Corp et Piers de Blakeneye, viscountes.
Page 36
v
Johan Gisors, meir.
Richard de Welforde et Simond de Mereworthe. [Vicountes.]
En mesme l'an estoit graunt descord entre le roy et les countes pur sire Piers de Gaverstone, pur ce qe le tresor de la tere fust despendu par luy en orgoille et graunt bobaunce, et le dit sire Piers avoit graunt indignacion de les grauntz de la tere, et dona à chescun graunt de la tere un sertein noun en eschar de mokerye. Issint qe il fut espyé hors del companie del roy, et pris par le counte de Warwyk, et le counseil de autres grauntz de la tere, et fut mesné à Warwik, et après par lour counseil le xix. jour de Juyn à houre de vespre il fut mené en un chaump q'est appelle Blakelowe, près de un eawe corraunt
Page 37
qe est appellé Gaversik, et illuk fust descolé. En cele an fut abatu un mure de tere près da la tour qe sire Johan Cromwell fit, dont graunt noyse fut cele nuyt la veile seint Matheu parentre le commune de la cyté et sire Johan de Cromwelle.vj
Johan Gisors, meir.
Adam Lucekyn et Johan Lambyn, vicountes.
En mesme l'an fu née sire Edward de Wyndesore, fitz le roy de dame Isabele la reyne, qe fu la fille le roy de Fraunce, le lundi en la feste seint Bryce; et le jour seint Esmon de Pounteneye, si fut il baptisé de sire Arnaud le cardinal. En cele an, le dimeigne après la chaundelure, firent les pessoners de Loundres une nief siglaunt par my chepe jeske à Weimouster. Et cele an morust Robert de Winchelsé, ercheveske de Caunterbury. En cele an fut le eir en Kent, et furent justices sire Hervy de Staunton, Henry Spygornel, William de Goldingtone, et Johan de Motteforde. Cele an morust Rauf de Baldok, esveske de Loundres.
vij
Nicholas de Farndon, meir.
Hughe de Barton et Robert de Burdeyn, vescountes.
En cele an fut sire Wauter Reynaud, eveske de Wircestre, tronicé en ercheveske de Caunterbury, le dymeigne après le fest seint Pere in cathedra. En cele an fut le roy descomfit à Strivelyn en Escoce, le jour de seint Johan le Baptiste, par Robert de Bruss. En cele bataile fut occys le counte de Gloucestre, sire Robert de Clifford, sire Giles d'Argentein, et moutz
Page 38
des autres, et le counte de Hereford et autres grauntz seignours furent pris et enprisonez à Bodevile, et le counte de Penbroke, sire Hugh le Despencer, Henry de Beaumond, Johan de Cromwell, et autres, s'enfuirent jeske à Dunbarre, et la se mistrent en mer et vindrent à Berwyk. En cele an fut mis aval la croisse del clocher seint Poul, et reparaillé, et furent trové en la veiglle crosse relikes, c'este à saver, j. corporeaux dount l'en chaunte messe, blaunk et entier saunz ascun enpirement, et en cele corpereaux fut trové un partye del fust de la crosse nostre seignour Jhesu Crist faite en le maner de un croisse, une piere del sepulcre nostre seignour, et un autre piere del lu ou Dieu estut quaunt il mounta en cyel, et un autre piere del mount de Calvarie où la croisse nostre seignour fut ficché. Et fut trovée un bourse, et en cele bourse une piece de sendal rouge, en la quele furent envolupez ossementz de les xjm. virgines, et autre reliqes dount les nounz ne furent conuz. Les queux relikes mestre Robert de Clothale mostra à le poeple en sa predicacion le dimeigne devant la feste seint Botolf, et après mesme ces reliqes furent mis arere en la croisse, et plosours autres noveles, le jour de seint Fraunceis.viij
Johan Gisors, meir.
Estevene de Abingdone et Hamon de Chikewelle, vicountes.
En cele an morust le counte de Warwik. En cele an fut si graunt pluvie qe blés failerent et totes autres choses en August, et durra la pluvie de la Pentecost jesk à la Paske. En cele an, le jour seint Jake devant l'Aust, fust j. pestour tret sur le claye soul, et pur çeo qe un altre pestour ne porta mie le juise, mesme le jour l'avantdit meir fust ledengée del poeple et appellé Rogier,
Page 39
par quey moutz des gentz furent enprisonnez et enpoveriz par mi le malice et faus compassement le dit Johan Gisors, meir.ix
Stevene de Abingdon, meir.
William Bodeleyhg et Hamon Godchep, vicountes.
En cele an fut graunt famine, qe poeple saunz noumbre morerent de feim, et fut auxint graunt morine d'autre gentz. L'en vendit cele an à la Pentecost, et après, le quarter de furment pur xxxviij. s. et pur xl. sold. et seel pur xl. s. et ij. petiz oynouns pur un dener.
x
Johan de Wengrave, meir.
William de Caustone et Rauf la Balaunce, vicountes.
Page 40
Uncore durra la graunt chiertée. Cele an en Juille fut graunt toneire, et graunt goute d'ewe, qe fit graunt damage al pount de Flete et al pount de Holborne.
xj
Johan de Wengrave, meir.
William de Furneaux et Johan Priour, vicountes.
En cele an, pur la colusion et conspiracie del dit meir, moveit graunt descord entre le comune et luy, et le comune ordeina serteinz pointz de lour novele chartre, qe fut mult countre la volenté le dit Johan, meir.
xij
Johan Wengrave, meir, par procurement de lettres le roy et par assent d'ascunes serteinez persones de poer encountre la volunté del comune.
Johan Poyntel et Johan Dallingge, viscountes.
En cele an fut la novele chartre confermé par le roy et cousta mil. liveres, le quele Johan Wengrave fit mult mal en son temps a le comune.
xiij
Hamond de Chikewell, meir.
Page 41
Johan de Prestone et Symond de Abingdone, vicountes.
En cele an passa le roy en Fraunce pur son homage faire, et la reygne ove luy. En cele an furent les espeyes defenduz, qe homme ne les portast, par quey moutz despeyes furent pris et penduz desus Ludgate dedeinz et de hors. En cele temps multz des gentz de mesters en Loundres furent vestuz de suite, et fut bon secle comensaunt.
xiiij
Nicholas de Farndon, meir.
William Prodhomme et Reynaud de Cunduyt, vicountes.
En cele temps, le meskerdi l'endemeyn seint Hillare, sistrent justices errantz à le tour de Loundres, c'est à savoir, sire Henri de Staunton, William Herle, Esmond Passelee. En cele an fut perdu le meyrauté de Loundres pur un trespas qe Johan Gysors fit en son temps quaunt il fut meir, pur çeo qe il ressut Henry de Braundeston, feloun le roy, de rejoier la fraunchise de Loundres après le felonie faite. Le quele Henri avoit occys un homme en seinte esglise à nostre dame atte hille. Et fu fait gardein sire Robert de Kendale, et il demorra gardein jeskes le meskerdy l'endemein de seint Donston, qe le roy graunta à le comune de eslire un meir à demorer jeske le quinzeine de seint Michel, issint qe Hamon de Chikewelle fut eslu meir. En cele aire fut ordeine qe nul felon le roy sera à mein
Page 42
prise taunke en aire de justices. En cele an une femme qe avoit à noun Isabele de Bury tua le clerk de l'esglise de Touz Seintz pres del mur de Loundres, et ele se tint en mesme l'esglise v. jours taunk l'esvesqe de Loundres maunda sa lettre qe le esglise ne la voleit saver, par quei ele fut mené hors de l'esglise à Neugate, et le tierze jour après ele fut pendu. En cele ayre furent gentz de poer, aldermans et autres, endités de faus conspiracie. En cele an moveit un descord entre les grauntz seignors de la tere et sire Hughe le Despenser, le piere et le fitz, de diverse articles et mauveis, qe les peres de la tere mistrent sure, par quoy le counte de Herford, les Mortimers, et plusours autres graunt seignours, destrurent lour teres et chateux, et vindrent ove graunt hoste armez à Loundres à le goule d'Augst, et la vielle l'assumpcion nostre dame furent les Despencers, le piere et le fitz, en le presence le roy à Weimouster exilez. Mes le roy maintint le fitz en le reaume par les cynk portz, et le dit sire Hughe le fitz robba par mer dromondez et autre niefs à graunt noumbre d'avoir qe furent venaunt vers Engeltere, et grant mal il fit par ewe en cest temps.xv
Hamon de Chikewelle, meir, eslu del commune par la volunté le roy. Richard Constantin et Richard Hakeneye, vicountes.
En cele an, devant les touz seintz, le roy assembla host et assega le chastel de Ledes, qe fut à sire Barthelmeu Badles
Page 43
mere, adonk seneschal le roy, et le roy entre le chastel le vielle de touz seintz, mès il fust tenu hors par un quinzeine; et donk sire Berthelmeu de Burghaisse et la dame de Badlesmere, et autres en lour companie, furent maundez à le tour de Loundres, et xiij. qe furent en le chastel furent penduz hors la porte, et un Watekyn Colpeper de Kent fut treyné et pendu à Winchilssé, et tost aprés le roy fist faire un chartre de grant servage, et voleit en tote manere qe les bone gentz de Loundres le ussent ensealé, mes les gentz de la cyté ne voudreient graunter pur rien qe le roy puet faire. En cele temps le roy s'en ala vers Wircestre ove graunt host, et à le feste de seint Lucye les gentz de Loundres maunderent au roy à Wircestre ccc. iiijxx. hommes de gentz bien armés. En cele an, à le conversion de seint Poul, les ij. Mortimers se rendirent à le grace le roy, et furent amenez à le tour de Loundres par le counte de Garenne, Robert Lewer, et plusours autres, le samadi après manger le veille de seint Valentyn. En cele temps fut le viscounte de Hereford trainé et pendu à Gloucestre. En cele temps, le iij jour de Marz, les gentz de Loundres maunderent au roy autre foithe vjxx. hommes armez. En cele temps le mardy prochein après le feste seint Gregorie, qe fut le xvj. jour de Marz, fut sire Thomas de LanPage 44
castre counte de v. countés prys à Burghbrigge par un sire Andreu de Herclé, et sire Humfrey de Boun counte de Hereford, tué, et moutz des bone gentz barounes de la tere tuez, pris, et enprisounez; et le xxj. jour de Marz fu le dit counte de Lancastre decolé à Pountfreit. Et mesme le jour William le fitz William, sire Waryn del Isle, sire Henry de Bradebourne, sire Thomas Mauduyt, sire William Tuchet, sire William Cheyné, barounes, et Thomas Page, vadlet au dit counte de Lancastre, furent touz treynez et penduz à Loundres, le tierze jour d'Averil, qe fut en la veille des Paumes. Et sire Johan Moubray, sire Roger de Clifford, sire Gosselyn d'Eyville, estoyent treynez et penduz à Everwik; et sire Henry Tyeis treiné et pendu à Loundres. Après, en la veille de paske, vint sire Barthelmeu Badlesmere, qe estoit graunt baroun et seneschal le roy à Loundres en alaunt à Caunterbure, et le meskerdi en le semeygne de paske il fut vilement treiné, pendu, et descolé à Caunterbure près de son neveue sire Barthelmeu de Assebournham. Sire Fraunceis de Aldenham treiné et pendu à Windesore le meskerdi apres le paske fflorie; sire Henry de Mountfort et sire Henry de Wilingham treinez et penduz à Bristuit; sire Johan Giffard et sire Roger de Elmerigge treinez et penduz à Gloucester; sire William Flemming treiné et pendu à Kerdyf; sire Thomas Colepeper treiné et pendu à Winchelsé; sire Stevene Baret treiné et pendu à Collyere. Sire Roger Dammory morust pur deol de droit mort à Tuttebury. Sire Hughe de Audelée le piere et sire Johan de Charltone se rendirent à le grace le roy. Sire Johan Butturd, sire Johan de Kingeston, sire Nichol Percy, sire Johan Mautravers le fitz, sire Johan de Twyford, sire William Trussel, se fuirent outre mer. Sire Roberd de Holond, sire Hughe d'Audelé le fitz, et iiijxx. et xij. autres bones chivalers, furent et en prisoun mis, et reintz à le volunté le roy. La veille seinte Margarete après les bone gentz de Loundres maunderent auPage 45
roy al Novele Chastel sure Tyne cent hommes bien armez et apparaillez. En cele temps l'on vendit le bussel de furment à iij. solđ. viij. đ. En cele temps, le ij. jour d'Augst, les deux Mortimers furent juggez à Weimouster devant vj. justices d'estre treyné et pendu pur homicide et robberies qe le roy les mist sure, mes nul execution ne fu fait de cele jugement par bref le roy. Et l'endemein après le roy les graunta vye d'estre en perpetuel prisoun de sa grace. En cele temps à le goule d'Aust le roy s'en ala ove son host en les parties d'Escoce, et fut entré en la tere bien à lx. lues, et illuk grauntment de son poeple morust de feim pur defaute de vitaile, et le roy nul encountre ne avoit. Mès hountousement se retourna en Engeltere, et son poeple mult destrut de graunt cheitiveté et myseyse.xvi
Hamon de Chikewelle, meir. Johan de Grantham, peverer, et Roger de Ely, pessoner, vicountes.
En cele an les Escoce vindrent sure Blakomore en Engeltere, et robberent et ardoyent par tut, et pristrent graunt partie del vitaile le roy, car il estoit à cele houre en les parties de Everwik. En mesme l'an, le joedi le iij. jour de Marz, sire Andreu de Hercleye fut fait counte de Karlil par le roy, pur ceo qe il avoit pris le noble counte sire Thomas de Lancastre, et occys Humfrei de Boun counte de Herford. Et mesme l'an le dit sire Andreu fut pris à Carlil, et illuk fut il treiné, pendu, descolé, et ses boeles ars et quarteré, et sa teste fu maundé à Loundres le dimeinge l'endemeyn seint Gregorie. En cele temps, le iiij. jour d'Averil, fut Hamon de Chikewelle, meir, aldermans, viscountes, et clers somonez d'estre devant le roy à Weimoster, et lors le roy par son eindegré saunz nul acoupement
Page 46
ousta le dit Hamon de sa meirauté, et fist Nichol de Farndone gardein de Loundres. Et le dit Hamon de Chikewelle, Hamon Godchep, Esmon Lambyn, et Roger Palmere, aldermans, suirent la court le roy pur attendre sa volunté de çeo dount il les voleit acouper. En cele temps Dieu fist plusours miracles en le esglise de seint Poul à la table qe le dit Thomas de Lancastre fist, en remembraunce qe le roy avoit graunté et affermé les ordenaunces qe furent faitz par seint Robert de Winchelsé, erchevesqe de Caunterbure, et par touz les grauntz et sages d'Engeltere, à graunt profit de tot le reaume. En quele lu les contraitz furent redressez, les vougles ressurent lour veue, et les sourdes le oye, et autres benefices de grace illuk overtement furent monstrez. En cele temps fut le vj.me dener de bienz levé en Loundres et en autres cytés en Engeltere, et sure upelond le x.me dener, à graunt destresse et enpoverissement del comun poeple de la tere. En cele temps fut le truwe pris parentre le roy d'Engeltere et sire Robert de Bruss, del xij.me jour de Juyn l'an xvj.me jesk à xiij aunz, sus divers condicions entre les parties affermez, si leauté se prenge. Et puisse après, à le translacion seint Thomas, par breff le roy issue del chauncerye, fut la table en le esglise seint Poul et le cyre qe illuqes fut offert en devocion del martyr de graunt reddour fut ousté et remewée, mès ja pur çeo ne fut ousté del tut la devocion del poeple, qe oblacions ne furent faitz à le piler où la table pendoit. Mesme l'an, le venderdy après manger le iij. jour devant le goule d'Augst, vint le chekker le roy de Everwik à Weymouster, et graunt tresor oveske. Mesme cele temps, le lundi en la feste seint Piere en le goule d'Augst à nuyt, sire Rogier Mortimer, seignour de Wigemor, par un boivere sotilement fait et doné mesme le seir à le constable et à les gaytes de la tour, et à autres qe leinz furent, par eschelesPage 47
queintement faitz de corde nutaundre eschapa hors de la tour de Loundres, et se fui taunk à Porchestre, et là il se mist en ewe et passa le mer, taunt qe il vint en le poer le counte de Henaude. En cele temps, le joedi l'endemein de l'exaltacion de la seint croisse, vindrent les iiij. burgeis qe avoyent suy la court le roy à Loundres ove bele companie des gentz.xvij
Nicholas de Farndone, meir, nient eslu ne presenté, mès par volunté le roy.
Adam de Salesbury et Johan de Oxenford, vicountes.
En cele temps, à la feste seint Martin et après, furent plusours bone gentz de Loundres et d'autre cytés et villes de la tere, atachez par un mauveis ribaud clerk, qe avoit la commissioun le roy, qe out à noun Thomas de Newebigging, qe les mist sure q'ils avoyent parlé ove sire Roger Mortimer et conseilé qe il fust eschapé hors de la tour. Et à la feste seint Nicholas, par la volunté le roy, Hamon de Chikewelle fut fait meir, et Nicholas de Farndone remue del office. Mesme l'an, à le seint Hillare, sistrent justices de forest à Stratford. Mesme l'an, à le qaremme pernaunt, tint le roy son parlement à Weimouster, et adonk le roy fist seiser par sa meyn totes les teres et chateux qe le esvesqe de Herford avoit, pur çeo qe le roy luy mist sure qe il avoit eydé les Mortimers vers luy. Et le primere dimeygne de qaremme après, un ministral q'out à noun Rogier Wade, croudere, fist son enterement solempne come il eust esté mort, et fist chaunter messes pur s'alme, et il mesmes et autres en sa companie offrirent, issint qe multz des gentz merveillent, et çeo fist il pur çeo qe il ne afioit en executours, pur le quele fait ascune gentz de religioun luy voleyent aver sustret sa liverée q'il avoit de eux achaté à terme de vie, et il mesme morust tost
Page 48
après le paske. Mesme l'an, à le fest seint Johan, moveit un descord parentre le roy de Fraunce et le roy d'Engeltere pur homage nient fait pur les teres de Gascoigne, pur quey le roy de Fraunce maunda sa gent pur seiser les teres de Gascoigne, et lors le roy d'Engeltere maunda illuk le counte de Kent son frere, et autres pur defendre la tere.xviij
Hamon de Chigewelle, meir.
Beneit de Folsham et Johan de Caustone, viscountes.
En cele temps, par abettement sire Hughe le Despencer, à le seint Michel, le roy avoit seisy en sa meyn touz les teres qe la roygne avoit en Engeltere, et remué tote sa meyné, Fraunceis et autres, et la mist à ses gages xx. sold. le jour. En cele an, à le paske, la reigne passa la mer pur entreter de la pés. Et à la fest de la seint croisse en Maii, le counte de Garenne et le counte d'Atheles, et autres grauntz, passerent ove cent niefs à Portesmouthe vers les parties de Gascoigne; pur le quele passage ceux de Loundres maunderent vijxx. hommes armez. Mesme le temps, le mardy, c'est à savoir le iiij. jour de July, eschaperent iiij. persons hors de Neugate à houre de noune, jeskes à les freres menours, et occirent le porter qe out à noun Nichol de Westmille. Et à le seint Bartelmeu prochein, le roy fust à Dovere iij. semeygnes ove son conseil, pur ordeiner son passage, et avoit maundé outre ses purveours, chivaux, et tresor, et le roy fut alé vers le nief pur passer, et par abettement de sire Hughe Despencer le quer luy chaunga, et ne passa poynt. Mès il maunda sire Edward de Windesore son fitz et heir, le jeodi prochein devant le feste del exaltacion del seinte croisse, en son lieu al roy de Fraunce pur faire l'omage. En cele an, à nuit en la feste del nativité nostre dame qe fust pur dymange, x. persounes eschaperent hors de Neugate, des queux v. furent remenez, e iiij. eschaperent à l'esglise seint Sepulcre, et un a l'esglise seint Bride, et après touz forsuirerent Engeltere.
Page 49
xix
Hamon de Chikewelle, meir.
Gilbert de Mordone et Johan Cotoun, viscountes.
En le mesme temps fut cryé par le roy qe nul homme portoit lettres de la reygne, ne de son fitz heir d'Engeltere, qe adonkes furent en les parties de Fraunce, et si nul porteit lettre qe il fut attaché, et celuy à qi la lettre irreit, et q'ils fussent amenez devant le roy et son counseil. En cele temps la reyne usa simple apparaille come dame de dolour qe avoit son seignour perdue. Et pur langwis q'ele avoit pur maintener la pées, le commune poeple mult la pleinoit. En cele an, le dymeygne prochein devant le conversioun seint Poul, un sire Roger Belers, justice le roy et graunt seignour, fut occys près de Leycestre, dount graunt clamour y fut, et mult des gentz enprisonez. En cele temps fut sire Henry de Beaumond et autres grauntz de poer attachez et enprisonez par le roy, pur çeo q'ils ne voleient acorder de faire la volunté sire Hughe Despencer le fitz. Et donk le roy par se[s] conseilers fit estover le tour de Loundres et autres chastels de vitaille. Et sire Hughe Despencer le fitz fist prendre touz les carpenters et masouns et fevres qe adonk estoient en Loundres, et par tut entour, si fist faire sus touz les turettes et kerneux en la tour, et à totes les portes illoqes, barrer et bretaxer del plus grosse meryn qe par mi Engeltere puet estre trovée, et fit faire magneles, springaldes, et autres maners engins, à graunt costage, et rien ne luy valust, kar son propos fust bestourné en autre manere, et tot çeo fu faite pur doute de la venue d'estraunge en la companie la reigne. En cele an, le surveille de la chaundelure à nuit, fut mis seint Erkenwolde en sa novele fertre en l'eglise seint Poule. Lors
Page 50
comaunda le roy qe sire William de Hermine, eveske de Norwiz, doit estre tenu pur traitour, et le roy luy mist sure q'il fut enchesoun qe la reigne se tenist et son fitz en les parties de Fraunce. Et le comune poeple pleinout mult le dit William Hermyn, pur çeo qe il fut prodhomme, et mult avoit travailée pur mayntener l'estat de la tere. Adonk fut le roy à Dovere, et messagers de l'apostoille vindrent là à luy, et ils retournerent ove lour respounce prevément, qe comune parlaunce ne fust pur quey ils vindrent ne quele respounce ils avoyent. En cele an fut graunt secheresse de rivers et de fountaigne, issint qe il avoit graunt defaute de ewe en plusours paiis. En cele temps, devant le feste seint Johan, ardoit la vile de Roiston et partie de Wandlesworth, l'abbeye de Croxtone pres de Leicestre, et autres arsouns furent adonke en Engeltere. En cele temps, pur defaute de ewe douce, la mer surmonteit issint qe le ewe de Tamyse fut salé, dont mult de gentz se pleinoient de la servoyse fut salé. En cele temps, à le sein Barnabé, les Engleisse conquistrent la tere de Gascoigne, qe le roy de Fraunce avoit chivauché, issint qe plusours gentz furent occys, pur quey le roy fist cryer le jour de seint Margarete qe nul Fraunceis deit marchaunder en Engeltere, ne venir en ces parties, et contient en le dit cri qe la reigne d'Engeltere ne doit estre apellé reigne. En cele temps touz les Engleisse qe furent en Fraunce furent attachez en un jour, qe fut graunt multitude de gentz. En cele temps le dit sire Edward, heir d'Engeltere et dame Isabele sa miere, reygne d'Engeltere, acrocherent à eux graunt poer de gentz, et grauntPage 51
navye, de venir en Engeltere ove multz des Henaud, et lors comaunda le roy de assembler graunt navye d'avoir destourbé le venue son fitz et la reyne et lour companie. Mès les mariners d'Engeltere ne furent pas en volunté à destourber lour venue, pur le graunt errour q'ils avoyent vers sire Hughe le Despencer, et pristrent lour conseil d'aler en Normondie, et la ariverent, robberent, et ardoyent, à graunt destruction de la tere, mès multz de nos gentz Engleisse furent illoqes occys. Et lors le meskerdi devant le feste seint Michel, qe fut par lundi, la reigne d'Engeltere et son fitz et le Mortimer, ove graunt companie de grauntz seignors et gentz d'armes, ariverent à Herwiche et Orewelle en Exsex, pur destrure les enemys de la tere.xx
Hamon de Chikewelle, meir.
Richard de Rothinge, taverner, et Roger Chaunceler, vicountes.
En cele temps, à le seint Michel, la roygne dame Isabele et sire Edward son fitz maunderent lour lettres à le comune de Loundres, q'ils fuissent eydauntz à destrure les enemys de la tere, mès nul respouns ne avoyent arere de lour volunté par doute del roy. Par quey une lettre fut maundé à Loundres par la reigne et son fitz, et fu ficché en l'aube de jour sur la croisse en Chepe, et la copie de la lettre par aillours sure fenestres, c'este à savoir, le joedi en la feste de seint Deonis, qe la comune fut eydaunt ove tut lour poer à destrure les enemys de la tere, et nomément Hughe le Despencer, pur le comun profit de tot le reaume, et qe la comune lour dussent maunder lour volunté par quoi la comunalté se moveit devers le meir et autres grauntz de la cyté à les freres prechours de Loundres le meskerdi devant le feste seint Luke, qe fut adonke par samadi, issint qe le meir
Page 52
mercy criant à jointes meyns ala à la Gildhalle, et graunta à le comune lur demaunde, et fut la cry fait en Chepe qe les enemis le roy et la reigne et lour fitz deveroient tost voider la vile sur peril qe puet avenir. Avint issint mesme le jour à houre de noune, qe ascun gent se mistrent à armez et pristrent un Johan le Marchal, burgeis de la cyté, qe fut tenu pur enemy à la cyté et espye sire Hughe le Despencer, en son hostel demesme près de Walbrok, et fut mené en Chepe, despoilé, et descolé. Taunt tost mesme le jour et mesme le houre vint un sire Wauter de Stapulton, qe fut eveske de Exestre, et l'an devant le tresorer le roy, chivachant vers son hostel en Eldedeaneslane à son manger, et là fut il escrié traitour, et il çeo oyaunt chivacha à la fuite devers l'esglise seint Poul, et fut là encountré et tost deschivaché et mené en Chepe, et la fut il despoillé et sa teste coupé. Et un de ses esquiers qe fust vigerous homme, qe out à noun William Walle, se mist à le fuite et fut arestu à le pount de Loundres, et remené en Chepe, et descolé, et un autre Johan de Padington, gardein del manoir l'evesqe avantdit de hors la barre du temple, fut tenu de mal afere, il fut descolé mesme le jour en chepe. Mesme le jour, countre le vespre, vint le queor de Seint Poul et prist le corps del dit evesqe saunz teste, et le porta à l'eglise seint Poul, et homme les fist entendant q'il morust en sentence, pur quey le corps fu porté à l'eglise seinte Clement dehors la barre du temple, et ceux de l'esglise le mistrent hors, issint qe femmes et cheitif poveraille pristrent le corps nue, mès qe une femme luy dona un auncyen drapiau pur coverer le ventre, et le foerent en une place degerpie saunz fosse faite, et ses esquiers près de luy tut nuz saunz office de prestre ou de clerk, et est la place apelle le Laweles chirche.Page 53
Cele nuyt fut un burgeis robbé qe out à noun Johan de Charltone. Item, le jeodi suaunt le manoir de Fynesbury et de YviPage 54
lane, qe furent à mestre Robert Baldok, chaunceler le roy, [furent] despoylés de vines et de totes choses qe leinz furent, et plusours autres robberies furent faitz en la cyté. Item, mesme cele jour fut le comunalté de Loundres armé et assemblé atte Ledenhalle sure Cornhille, et le constable de la tour illoqes graunta à le comune deliverer à eux sire Johan de Eltham, fitz le roy, et les enfauntz sire Roger Mortimer, sire Moriz de Berklée, sire Barthelmeu de Burghasche, et les autres persons qe furent enprisonez en la tour, pur la querele dont sire Thomas de Lancastre et autres grauntz furent mis à la mort, et ceux qe furent deliverez furent jurez à le comune de vivere et morir ovesqe eux en cele querele, et pur meintener l'estat de la cyté et la pees. Et auxint furent jurez et rescuz en la proteccion de la cyté le dean de seint Poul, le official de Caunterbury, le dean des Arches, l'abbé de Weimouster et de Stratford, et touz les religious, et touz les justices et clerkz, et de faire gaite come apent. En cele temps, le veille de seint Luke, fut la table qe sire Thomas de Lancastre fist peindre et pendre en l'esglise seint Poul fut remis al piler, la quele table par bref del roy de graunt reddour fut del piler ousté. En le mesme temps les freres prechours se mistrent à le fuite pur çeo qe ils se doterent estre maubailiz et destrutz, pur çeo qe le comunalté les avoyent mult encountre queor pur lour orgelousse port, q'ils ne se porteient come freres duissent. En cele temps, comune parlaunce fut par tut qe si Stevene de Segrave evesqe de Loundres eust esté trové q'il eust passé par my l'espeye oveske les autres qe furent descolez, et justices et autres, qe se mistrent par aillours en tapinage qe homme ne les porreit trover. En cele temps nuls plez ne furent pledez en le court le official de Caunterburi, n'en consistorie ne devantPage 55
commissarie, fors de çeo qe toucha matrimonie ou testament, pur doute de mover mellé. En cele temps fut contrové une fause lettre, et fut lue à le Gildhalle en deseyte del poeple, qe le roy et la reygne furent acordez, et qe les enemys de la tere furent pris, qe adonke tot fu faus. En cele temps, le roy en companie de ses enemis se mist par ewe de Bristowe, qe homme ne savoit à çeo temps où il fut devenu, et le lundi en la veille seint Simond et Jude sire Hughe le Despencer le piere fut pris à Bristowe, et illoqes trayné, pendu, et descolé, et sa teste maundé à Wincestre pur çeo qil fut counte de Wincestre. En cele temps, le samadi en la veille seint Esmon l'evesqe, vint l'evesqe de Wincestre, qe estoit venu de la reygne à le Gildhalle, et là fut il ressu d'estre un del comune de vivere et morir ovesqe eux en la querele, et de meintener la fraunchise, et il porteit lettres de la reygne et de son fitz qe la comune deit eslire un meir entre eux; kar devant n'avoit il nul meir fors par le grace le roy, pur çeo qe le meirauté esteit perdu en aire de justice. Issint q'il eslurent mesme le jour un Richard de Betoygne d'estre meir, qe estoit venu adonke dePage 56
la reigne, et si avoit il mesme l'an graunt persecucion par le roy et sire Hughe Despencer le fitz. En le mesme temps sire Henry de Lancastre et autres grauntz pursuerent le roy en Gales pres de Snaudon si estreitement qe le roy guerpist ses enemys, qe avoyent luy amené hors de son reaume, et se rendit à ses lige gentz, et là les enemys furent pris, sire Hughe Despencer, sire Robert de Baldok, et autres en lour companie, et furent amenez à Herforde. Item, le lundy suyant [fut] le counte d'Aroundel descolé à Herforde, et le meskerdy après fut un Bernard d'Espaygne, marchant de vines, pur treson qe il fit, descolé à Loundres à Nomanneslond. Item, le lundi en la veille seinte Katerine, fut sire Hughe le Despencer le fitz treyné, pendu, et descolé, ses boeles ars, à Herforde, et un Symond de Redingge, qe avoit despisé la royne, treyné et pendu, et un mestre Robert de Baldok, qe fut chaunceler le roy, un des plus grauntz seignours de la tere. L'evesqe de Herforde, et lePage 57
priour de Herforde, furent mis en prison. Item, le joedi apres manger, la surveille de seint Nicholas, fut la teste sire Hughe le Despencer le fitz porté ove trumpes par my Chepe, tanqe á le pount de Loundres, et illoqes fust la teste fichée, et donkes fust leroy maundé au chastel de Kelingworthe en la garde sire Henry counte de Lancastre. En cele an la reygne et son fitz vindrent à Loundres ove bele companie des graunt de la tere et des burgeis de Loundres, le dymeigge prochein devant le Thiphanie, pur tenir parlement. Issint qe le marzdy le jour de seint Hillare l'erchevesqe de Caunterbury pronuncia à Weimouster devant tot le barnage de la tere plusours articles encountre le roy. Par quey tot le poeple graunta et cria q'il ne devereit plus regner, mès qe l'en freit roy son fitz le duk de Gyene. Par quoy eveskes, abbés, priours, countes, barounes, chivalers, et burgeis furent maundez à luy al chastel de Kylingworthe, de oyer sa volunté, s'il voleit assenter à le corounement de son fitz et sey demettre del regne, et si noun les messagers rendirent sus lour homage pur tot la tere. Dount tanke les messagers furent au roy, le dimaigne devant le feste Fabian et Sebastian, il fut crié en Chepe qe touz qe devoyent servise à le corounement le roy, ou q'il cleyment service avoir, q'ils fussent al corounement le novele roy sire Edward duk de Gyene le dimainche laPage 58
veille de la chaundelure. En mesme le temps, le marsdy en la feste seint Fabian et Sebastian, sire Wauter Reinaud, erchevesqe de Caunterbury, precha à le Gildhalle de Loundres, et vij. evesqes vindrent ove luy, et là fist il le serment ove les autres evesqes, come les graunt avoyent jurrez devant. Et pur çeo qe le comune de Loundres avoyent l'erchevesqe countre queor pur multz enchesounes, le dit erchevesqe graunta à le comune de doner à eux l. toneux de vin, et outre çeo de faire gré à chescun l'endemeyn qe se voudra pleindre par bille resounablement sure luy. Et lors fut sire Edward de Carnarvon maundé au chastel de Berklée hors del chastel de Kelingworthe, pur doute q'il dust aver esté ravy par abettement et le procurement de un frere prechour qe out à noun frere Thomas Dunheved, et plusours autres de l'ordre asentaunt à luy, et puisse fust il pris et plusours autres ove luy, et mys en dure prisoun à Everwik. Et adonkes avoit sire Edward de Carnarvan ceux gardeinz, sire Thomas de Berklé et sire Johan Mautravers, pur luy savement aver garde en perpetuel prisoun. Et par abetement de ascunes sertein persones et l'assent de ses faus gardeinz, treiterousment nutaundre estoit vilement murdriz, come faus et desseaux perjours. Le dit Edward regna icy xix. aunz et di. et gist à Gloucestre.Page 59
EDWARDUS TERTIUS.
Ceux sount les nouns des meirs et viscountes en le temps Edward le Tierce né à Windesore, et autres merveiles qe ount esté en le mesme temps.j
Richard de Betaigne, meir.
Richard de Rothingge et Roger Chaunceler, vescountes.
Cist Edward de Windesore fut fait chivaler et corouné à roy tut en un jour, et ne fut fors xiiij. aunz d'age le jour de seint Bryce darrein passé devant, et adonkes tint graunt parlement à Weimouster. En cele parlement le roy graunta à le cité de Loundres totes lour fraunchises q'il avoyent perdu devant, et graunta à le cité autre fraunchises qe onkes roy ne graunta devant, qe le meir serroit justice en la Gildhalle, et qe devant luy serroient dampnez qe furent pris de felonie ou de larcine dedeinz le fraunchise, par quey le viij. jour de Maij furent iij. juggez à la mort, qe adonkes fut venderdi prochein après la feste seint Johan ante portam Latinam. En cele temps, à le assen
Page 60
cion, le joevene roy ove graunt poer de sa tere se apparaila al Novele Chastel d'aler sure les Escoce, et si avoit-il de Loundres cc. hommes à chival bien armez. A cele houre furent les Escoces entrez en Stannowe park en Engeltere. Et quaunt nostre joevene roy vint, il mist ses tentes et paveliounes, et assega le dit park à xv. jours. Et pur envye qe les graunt d'Engeltere avoyent vers les Henaudes, par assent les Escoces nutaundre eschaperent hors de la parke, là où ils purroyent trestouz aver esté pris, occys, et confunduz. Et par assent des ascuns treitres, James Douglas entra en les pavelliouns nostre joevene roy pur luy aver ravy en le poer d'Escoce. Mès le dit James Douglas fut escryé des gueites en l'ost, et se mist à le fuite, et son chapelein fort et vigerous fust arestu et occys. Et adonkes le roy et son poeple retournerent à Everwik, et dementers sourda un graunt descorde entre les Engleisse et les Henaudez, par quey plusours de nos gentz Engleisse furent occys en lour hostels. Et de illoqes le roy ala à Nichole, et là tint-il son parlement. Et donkes estoit la mort sire Edward de Carnarvan son piere pupplié, qe estoit tretousement murdriz en le chastel de Berklé,Page 61
come Dieu le sciet. Et lors vint dame Phelipe, la fille le counte de Henaude, à Loundres pur estre mariée à nostre joevene roy. Et tost après le roy la esposa à Everwyk, et illoqes tint son parlement. Et adonkes vindrent messagers d'Escoce illoqes pur attreter la pees, et nostre joevene roy maunda ses messagers à les grauntz d'Escoce de saver tut lour volunté.ij
Hamon de Chikewell, meyr.
Henry Darcy et Johan Hauteyn, vicountes.
Et adonkes fut grauntée, ordeinée, et cryé, et puppliée par entre les deux realmes, par assent dame Isabele la roygne la mere au roy et sir Rogier Mortimer et autres de lour covyne, qe David le Bruiss fitz Robert le Bruiss naguers roy d'Escoce esposereit dame Johane de la Tour, la soer à nostre joevene roy, les queles esposailes furent faitz à Everwyk le dimenge prochein devant la feste seinte Margarete ove graunt solempneté. Et adonkes la royne dame Isabele et sire Roger Mortimer achrocherent à eux real poair des plusours grauntz d'Engeltere et de Gales, et le tresor de la tere retindrent devers eux, et tindrent le joevene roy tut à desuthe lour subjeccion, si qe monsieur
Page 62
Henry counte de Lancaster, qe estoit fait chief gardein du roy à le comensement de son corounement par comun assent de tut le realme, ne poeit à luy approcher ne conseiller. Par quey monsieur Henry le dit counte, ove counseil des plusours grauntz de la tere, et par l'erchevesqe de Caunterbury, et autres evesqes, se moveyent grauntment vers la roygne dame Isabele et sire Roger le Mortimer, pur redresser la defaute qe le roy poeit vivere de son propre saunz torcenouses preses faire en poverisement du poeple.iij
Johan de Grantham, meir.
Simond Fraunceis et Henri Combemartin, vicountes.
En cele an nostre joevene roy passa la mer ove bele companie vers le roy de Fraunce, pur faire son homage pur les teres de Gascoygne, et ne demorra geres, mès revint en Engeltere, et à Caunterbury fit faire solempne joustes, et puisse après à Loundres en Chepe. Unkes ne furent si solempne joustes tenuz en Engeltere.
iiij
Simond Swanlond, meir.
Page 63
Richard Lacer et Henry Gisors, viscountes.
Mesme l'an dame Phelipe la royne estoit corouné à Weimoster le dimeigne en qaremme prenaunt. Et en la semeigne prochein suiaunt, le roy tint son parlement à Wincestre. Et là fust sire Esmon de Wodestoke counte de Kent attachée, qe estoit fitz au roy, frere au roy, et uncle à nostre joevene roy, et fust à droit fut à tort illoqes estoit-il juggée, descolée, et mys à la mort. Et puiss après en mesme l'an, le roy tint son counseil à Notingham, et là aparceut-il bien en diverse maners q'il avoit fole counseil, et son realme en point d'estre perdu, et le poeple auxint. Par quey le roy le prist grauntment à quoer. Car la reigne sa miere et sire Roger Mortimer avoyent tote la tere en lour mayns, et graunt host coillerent de Gales et d'Engeltere, et firent graunt destruccion par tot là où ils venoyent, issint q'il n'avoit femme, espouse, ne pucele en tot le paiis entour xl. lues et plus qe eles ne furent parjuwés et refetez devant les oiz lour barounes en graunt despit. Et si tindrent le joevene roy et sire Johan de Eltham son frere tot à desouthe. Et en le mesme temps, come Dieux y voleit, le roy ove son counseil fist prevément prendre sire Roger le Mortimer en son lit en le chastel de Notingham, et autres ovesqe luy, si les fist maunder à le tour de Loundres, les queux avoyent purpensée d'avoir forfait le roy et tot le saunk de luy, et puisse après sire Roger Mortimer et sire
Page 64
Symond de Bereford, qe estoit de son counsail, furent treinez et penduz à Loundres.v
Johan de Polteneye, meir.
Page 65
Robert de Ely et Thomas Horewod, viscountes.
En mesme l'an le roy ove graunt host chivacha en les
Page 66
parties de Escoce près de Berwyk, et dona bataille à les Escoces, et combatit pé à pé, et descomfit et occist de les EscosesPage 67
lx. mils vijc. xviij. Et quaunt ceux de Berwyk virent coment la bataille fust descomfit, ove haute voice crierent à sire Edward nostre joevene roy d'aver vie et membre de sa grace, et le roy les graunta vie et membre, et tauntost rendirent sus la vile de Berwyk à luy, de quey tote Engeltere en avoit graunt joye, et si revint en Engeltere pur meintener la pes et chastiser les meffesauntz.vj
Johan de Polteneye, meir.
Johan de Mokkinge et Andreu Aubri, viscountes.
vij
Johan de Prestone, meir.
Nicholas Pike et Johan Husbonde, viscountes.
viij
Johan Polteneye, meir.
Johan Hamond et William Haunsard, vicountes.
Page 68
En mesme l'an le duke de Bretaigne vint en Engeltere à faire homage à nostre joevene roy pur aver ses teres en Engeltere en pées. Et mesme l'an le roy fist un autre chivachée en Escoce, pur çeo q'ils ne voleyent tenir nul pés, mes tous jours guerroyer, et si passa le roy parmi la tere, et les Escoces touz jours se mistrent à le fuite, si qe nule encountre adonkes ne poeit trover. Par quey le roy fust mult irré, et tot son poeple si revint en Engeltere, et fist establer les leys et chastier les faus et desleaux et meffesauntz de sa tere.
ix
Reynold del Conduyt, meir.
Johan de Hinggestone et Wauter Turke, viscountes.
Page 69
x
Reynold del Conduyt, meir.
Wauter de Mordone et Rauf de Uptone, viscountes.
xj
Johan de Polteneye, meir.
William Brikelesworthe et Johan de Northall, viscountes.
xij
Henry Darcy, meir.
Wauter Nele et Nicholas Crane, viscountes.
Et mesme l'an les Escoces comencerent autre ffoithe à guerroier encountre nostre roy, et le roy le tierce foythe assembla
Page 70
graunt host et chivacha par my la tere d'Escoce, mais il ne put trover nul encountre, par quey le roy et tot son host furent mult irrez. Et en revenaunt vers Engeltere le roy fist asseger le chastel de Dunbarre, et là demorra bien xv. semeygnes, taunqe le roy de Fraunce comenza torcenousement de mover guerre vers sire Edward nostre joevene roy. Et lors furent maundez messagers à le roy de Fraunce, c'est à savoir, l'erchevesqe de Caunterbury, l'evesqe de Durham, sire Geffrey Scrope, et sire William de Clintone counte de Huntingdon, pur atreter la pés entre les deux realmes, Fraunce et Engeltere, et luy profrerent graunt douns, mariage, et graunt tresor, et le roy de Fraunce en nule manere ne voleit assenter ne acorde graunter, mès en tote manere guerrer, et la tere de GascoignePage 71
prendre en sa meyn, et totes les teres qe nostre joevene roy avoit dela le mer; et lors quaunt nostre joevene roy aparceust qe le roy de Fraunce ne voleit autrement faire, si maunda pur touz les grauntz d'Engeltere, et tint un parlement à Weymouster, et prist son conseil de passer la mer et chivacher sure le roy de Fraunce qe nul pées ne voleit aver, si demaunda eyde de tot sa tere, et lors luy ottroyent à sa guerre performer graunt tresor et graunt multitude de gentz d'armes, et touz les leynes d'Engeltere par deux aunz d'estre servy al comensement de son aler.xiij
Henry Darcy, meir.
William Pountfreit et Hughe Marberer, vicountes.
En cele an nostre joevene roy se apparila ove graunt poer des Engleis et de Gales, si passa la mer à Orewelle en Essex, et ariva sus en Flaundres, et ses gentz passerent avant en le ysle de Cagent, et tuerent touz qe leinz porroyent estre trovez, et si avoyent illoqes graunt avoir, et puisse ardoient sus tot le dit isle. Et adonke nostre joevene roy prist son host, si s'en ala en Braban, et demorra pur long temps à Andwerp, et tint illoqes son parlement, et là furent jurez à luy tous ceux de Flaundres, de Braban, de Henaud, et de Alemaygne à nostre joevene roy, de vivere et morir ovesqe luy en sa querele vers le roy de Fraunce. Auxint nostre joevene roy graunta d'estre lour lige seignour, de vivere et morir ovesqe eux et lur defendre et meintenir vers totes gentz de mounde pur touz jours. Et quaunt ceste alyaunce fu fait par assent des avantditz teres, sire Edward nostre joevene roy prist son host, si se remua de Andwerp, et comensa de chivacher sur le roy de Fraunce dedeinz sa tere, si ardoit par tot et conquist plus qe viijxx. luwes de la tere. Et lors estoit sertein jour assigné d'aver en bataile parentre les deux rois. Et quaunt le houre avint qe la bataile doit aver esté feru, Phelip de Valoys le roy de Fraunce, le queor
Page 72
luy chaunga, et comensa à fremyr quaunt il vit nos gentz tous prest en chaumpz batailez sertein assys, si se retrait come chivaler desleaux, et dit come coward qe son queor luy dona d'estre descomfit en la bataille à ycele jour. Par quey il se retrait ove son host vers Paris, à graunt hounte de luy pur touz jours, et à nostre roy d'Engeltere honour et victorie pur touz jours. Et à cele houre Phelip de Valois perdit le noun d'estre appellé le roy de Fraunce, et à sire Edward nostre roy fust donée le noun d'estre apellé droiturel roy de Fraunce et d'Engeltere, et fust graunté de tot le chivalrie de cristienté. Et adonke nostre joevene roy, le duk de Braban, le counte de Henaud, le counte de Julers, le counte de Gerle, et plusours autres grauntz de diverses teres, se retournerent chescun vers son paiis. Mès avaunt qe le host se departist, les Alemauns riflerent les Engleiss de çeo q'ils avoyent gaignê à cele alée, et occyrent plusours de nos gentz. Mès sire Edward nostre roy et le duk de Braban et autres grauntz firent la graunt conteke sesser et peser, si qe touz furent acordez. Et adonkes le roy ove son poeple revint à Andwerp en Braban, et la demorra longe temps ove graunt conseil de touz les grauntz qe estoyent jurez à luy. Et unqes en le mesme temps ne osast Phelip de Valoys ove son orgeliouse bobaunce aprocher à nostrePage 73
joevene roy. Mès dit à touz qe entour luy erent, qe ly suffreit giser en pées et despendre quaunt qe il avoit, e plus qe tot son realme d'Engeltere ne poeit suffire, issint qe luy ferroit le plus riche roy ou le plus poveres de tot le monde. Et adonkes nostre joevene roy prist son congée del duke de Braban, et de touz les grauntz de là qe à luy furent jurez, de revenir en Engeltere pur ordeiner son estat de son realme, taunqe à sertein houre q'ils porroyent mieutz estre avengée de Phelip le Valois, roy de Fraunce. Adonqes revint nostre roy en Engeltere, et lessa la reigne dame Phelipe illoqes en hostage, et ses enfauntz en la garde le duke de Braban, et autres grauntz assocyez à luy, et demorra à Gaunt jeske le revenue de son seignour. Et en le mesme temps furent pris monsieur William Mountagu, counte de Salesbury, et monsieur Robert de Offorde, counte de Suffolk, et amenez à Paris vilement. Et adonkes le roy de Fraunce à eux dit, "A! tretours, vous serrez pendus pur çeo qe vous ne pussetz amender le damage qe vostre roy et vous avetz fait en ma tere." "Sertis, sire," dit monsieur William Mountagu, "vous avez le tort et nostre roy le verité, et çeo voille jeo prover vers qi qe le countredirra, cum leal chivaler ferra en estraunge tere." Et adonke dit la royne de Fraunce jurra q'ele ne serra jammès lée ne joyouse, si ils ne soyent vilement mis à mort. "Sire," dit le roy de Beame, "çeo serreit mult graunt damage et folie de occyre tels seingnours; kar si il avigne qe lePage 74
roy d'Engeltere entre autre foithe en vostre reaume de Fraunce et preigne ascun pere de vostre reaume, uncore put un aler en eschaunge pur un autre de nostre amis." Et si ariva adonkes nostre seignour le roy à Herwiz en Suffolke, et vint à Loundres devant le qaremme pernaunt, et illoqes demorra, et tint son general parlement à Weymouster de touz les grauntz de sa tere. Et à cele parlement vindrent messagers d'Escoce pur demaunder pés, mès nule ne lour fust graunté. Et en le mesme temps Phelip de Valoys fist faire tote la navie qe homme savoit ordeiner, des galeyes, spynagtz, grosses barges, et touz les grauntz niefs d'Espaygne de Normondie, et par tot où eles pussent estre trovez, de forbarrer la venue de nostre joevene roy ariere en sa tere, et tot le realme d'Engeltere avoir pris et occys. Et en le mesme temps graunt mal et graunt destruccion sure Engeltere fesoit. Car à le houre la vile de Suthamton et Portesmouthe furent ars nutaundre, robbez, et enportez. Et le chastel de Gerneseye pris, et les gentz leinz occys, par tresoun del conestable du dit chastel. Mais quaunt nostre joevene roy çeoPage 75
oyst, et aparceust la graunt felonye et compassement de son enemy Phelip de Valoys, il comaunda en haste qe tot son navie d'Engeltere fust prest, et chescun bien apparaillé et vitaillé à sertein jour assys.xiiij
Andreu Aubry, meir.
William de Thorneye et Rogier de Forsham, vicountes.
Page 76
En cele an touz les mariners d'Engeltere par comission nostre seignour le roy firent tost lur niefs assembler et vitailer, et totes partz de hardi et vigerous gentz bien apparailer et armer surement, pur vivere et morir, en chescun lieu. Et quaunt la flote des niefs d'Engeltere furent assemblez en la manere come avant est dit, sire Edward nostre roy et son poeple estoient en les parties de Seint Edmoun de Bury, et de illoqes se passa taunqe à Orwelle, et là se mist en mier ove son poeple saunz noumbre, le joedi prochein devant le nativité seint Johan Baptistre, qe fust par samady, et le venderdy matyn nostre roy vist ses enemis sure le mier, et dit, "pur çeo qe nostre seignour Jhesu Crist fust mis à mort par venderdi, nous ne volom espaunder nul saunke yceste jour." Lors avoit le vent esté en le orient devant qe le roy entra en mier tote la quinzeine entier, mès par la grace de luy tut puissant le vent torna meintenaunt en le occident. Issint par le grace de Dieu qe le roy et son flote avoyent vent et temps à lour volunté. Et si siglerent avant taunqe à le aube de jour del soleil levaunt, et vist ses enemis si fortement apparaillez qe çeo fust trop hidouse chose à regarder, kar la flote des niefs de Fraunce estoient si fortement entre lyez de grosses cheines, chatelez, bretaxez, et barrez. Mais ne pur quaunt Sire Edward nostre roy dit à touz qe entour luy erent en la flote d'Engeltere, "Beaus seignours et mes freres, ne soyez de rien esbayez, mès soyez touz de bon confort, et celuy qe pur moy huy prent la batayle et combatra ove bon fyn queor avera la benisoun de Dieu le tot pussant, et chescun avera çeo qe il purra gaigner." Et si tost com nostre roy avoit çeo dit, trestouz furent de fin egre queor de luy venger de ses enemys. Et lors nos mariners treyerent les sigles à demi mast, et treierent sus lour ankres en manere come ils voleient fuir, et quaunt la navie de Fraunce çeo virent ils se deslierent de lour grosses cheines pur nous pursuer. Et meintenaunt nous niefs retournerent sure eux, et la medlé comensa des trompes, nakaires, fioles, tabours, et de plusours autre menistracile. Et lors vigerousment nostre roy
Page 77
ove ccc. niefs asailerent les Fraunceis ove vc. grauntz niefs et galeies, et egrement touz nos gentz mistrent graunt diligence de doner bataille à les Fraunceis. Nos archers et nos arblasters comenserent à trere si espessement come grisil chiet en yver, et nos enginours getterent si durement, qe les Fraunceis n'avoyent poer de regarder ne lour testes sustener. Et endementers qe cele assaut durra, nos gentz Engleisse ove graunt force entrerent en lour galeyes et ove les Fraunceis meyn à meyn combaterent, et hors de lour niefs et galeyes engetterent. Et totdis nostre roy les conforta de fortment combatre ove ses enemys, à qe fust en le coge Thomas de Winchelsee. Et à houre de tierce vint à eux un nief de Loundres, qe estoit à William Haunsard, qe fit mult bien en le dit bataile. Kar la bataile estoit si redde et si dure, qe l'assaut durra de noune tot la jour et tot la nuit et lendemeyn taunqe à houre de prime, et quaunt la bataile fust descomfit, nul Fraunceis remist en vie forsqe Spaudefisshe, qe s'enfuit ove xxiiij. niefs et galeyes. Et apres cele graunt bataile conquis, sire Edward nostre roy totdis estoutement se tint en la mier, et ne voleit en nule manere sure tere ariver, et là tint son parlement par un quinzeine entier, de ver si ascuns de ses enemys luy vodrent plus assailer. Et adonkes nostre joevene roy ariva sus à tere, et chivacha à Bruges ove tresbele companye, et là tint il feste tot un semeigne plenere. Et lors après sire Edward nostre roy prist son host ove tresbelePage 78
companye des ducks, countes de graunt seignourie, et comensa de chivacher en Fraunce sure le roy Phelip de Valois, taunt qe il vint à le fort cyté de Tornaye, et assegea la dite cyté ove graunt host un quarter de l'an, cest à savoir del nativité seint Johan Baptist taunqe à la feste seint Michel. Et illuqes vint à luy le duke de Braban, ove vijxx. x. hommes à chival bien armez; le counte de Henaud vint ove autre ataunt, si qe son host tot envyroun contient xvij. lues de mesme le paiis, qe fust le plus beal host qe unqes fust veu devant. Et taunqe le siege se tint entour la forte cyté de Torneye, sire Robert le counte d'Artoys, sire Wauter de Manny, Jakes de Artefelde, et plusours autres grauntz, assemblerent graunt host de bone gentz à chival et à pié, bien armez, et pristrent lour chemyn, taunqe à le cyté de seint Thomer, et hastiment le dit cité assailerent, et comencerent de getter gross pieres ove lour engines pur destrure la dit cité. Et quaunt ceux dedeinz la cité virent le compassement de nos gentz dehors, ils pristrent lour counseil de overer les portes et doner bataile à nos gentz. Et quaunt nos gentz çeo aparceurent, ils se retraerent et suffrirent de bon volunté graunt multitude des gentz venir hors de la cyté. EtPage 79
quaunt le poeple furent touz issuz hors de la cyté, nos gentz de tresbone volunté soy retornerent, et forte bataille à les Fraunceis donerent, et touz ceux qe vindrent en chaumps pristrent mort à vile meschaunce, kar des Fraunceis furent occys cynk mil cc. et x. Des queux mortz furent trovez iiijxx. et xv. des esporounes dorrez. Si qe nos gentz pursuirent les Fraunceis taunqe à le porte de seint Thomer, et illoqes dreit à portecolyz les Fraunceis furent touz occys. Et ceux qe furent eschapé dedeinz la porte, n'oserent mès venir hors de la cyté taunqe nos gentz furent deseverez vers la siege de Torneye. Et endementers qe le siege durra, ceste à savoir un quarter d'un an, nos gentz de jour en jour chivacherent en les parties de Fraunce, et arderent et pristrent praye et chivalers prisouns et esquiers de graunt renoun, bestes, blesse, et autres vitailles avoyent del roy de Fraunce, si qe le paiis tut envyroun la sege estoit pris, ars, et mis à destruccion. A cele houre, taunqe le siege durra, sire Edward nostre roy fist faire assaut à la dite cyté de Torneye sis foithe le jour ove springals et magnels, gettauntz grosses pieres, engyns ove poudres, feu rosée, issint qe les engyns ove les grosses pieres debriserent les toures et les fort mures, esglises, clochers, fortz sales, beaus mavautyes, et riche habitacions, par tot la dite cyté de Torneye. Et la poeple dedeinz la vyle estoyent apoy destrutz pur la graunt famyne q'estoit en la dit cyté. Kar l'eawe currant par une bele river, qe parmi la cyté soleit passer, lour fust fors barré et detenu, si qe chival ne autre vif beste ne fust remys en vye en tot la dite cyté; kar ils estoyent si estreitement tenuz en la dite cyté, et la famyne fust si graunt, kar le quarter de furment valust iiij. liveres d'esterlings, le quarter d'aveyne pur deus mars, un oef de gelyne sis deners, deus oygnouns pur un dener. Et nos gentz dehors en la siege par tot le host le roy d'Engeltere avoient auxi graunt plenté de vitailles, vyn, payn, chars de chescun manere, si qe rien ne failist, loé en soit douce Jhesu Crist. Et en le mesme temps, ceux dedeinz la cyté de Torneye firent escrire un lettre à lour roy Phelip de Valoys, q'il lour eydast de sonPage 80
poer en haste, ou autrement il lour covendroit à force la dite cité sus rendre al roy d'Engeltere, kar lour gentz q'ils avoyent en la cité furent occys, mortz, et destrutz, et lour vitailles tot anienty, si q'ils n'avoyent riens dont vivere, ne la cité plus meintener encountre lour adversarie le roy d'Engeltere. Et quaunt lour lettres furent faitz, ils pristrent un vadlet, si luy vestirent en poveres draps come un Jacopyn, et luy bailerent lour lettres de porter à lour roy Phelip de Valoys, et luy mistrent nutaundre hors à un posterne privement. Et quaunt il fust passé bien deus luwes de la cyté, en l'aube de jour monsieur Henry de Lancastre counte de Derby luy encountra hors du chemyn, et luy fist arester et aresona, et le vadlet varia en ses paroles. Et taunt tost monsieur Henry luy fist sercher, et les lettres sur luy troverent, et devant le roy d'Engeltere cist Jacopyn tost amenerent, et fust apposée sure vye et membre pur dire tot la verité de la forte cité de Torneye. Et taunttost le messager comensa sa resoun devant le roy: "Sire," fit-il, "de rien ne vous mentray; sertis, touz lour gentz d'armes sount occys, et ne sount remys outre cc. hommes defensables; ne vitailes ne ount-ils de eux sustener outre un quinzeine." Et mesme le jour le counte de Henaud prist graunt poeple ove luy, si chivacha à forage bien xx. luwes de la tere loynz de la siege, et prist graunt praye des bestes de Fraunce, et occist gentz d'armez à graunt noumbre, et prist xxvj. chivalers des plus vailauntz qe Phelip de Valoys à cele houre avoit, si les fist amener come prisons au roy d'Engeltere; des bestes, des vitailes auxint saunz noumbre. Kar homme poeit aver un bon beof pur xl. deners, un pork pur xviij. d., un motoun pur xij. d., payn, vin à garant fuyson; benoit en soit Dieux! Et quaunt les noveles vindrent à Phelip de Valois coment il avoit perdu ses vailauntz chivalers et ses gentz occys, ses bestes et son vitailles pris, et kariée à son enemy le roy d'Engeltere, si comensa de suspirer et graunt deol demPage 81
ener. Kar il ne osast bataille à nostre roy d'Engeltere doner; mès come coward et recru chivaler fist d'une dame la contesse de Henaud son messager de venir à nostre roy et à son counseil, pur prier de cesser q'il ne voleit plus le saunk des Cristienz espaunder ne lour bienz destrure, issint qe pées porroit estre entre les deus realmes, ove autrement trues à sa volunté, si come les parties porroient acorder. Et le dit Philip de Valoys luy grauntereit en le mesme temps d'avoir en pées Gascoigne, Peyto, Normondie, Aungeo, et totes les teres qe unkes furent à nul de ses auncestres en celes partyes, q'il clama de droit avoir, si qe nule occisioun des gentz par tere ne par mier, arsure, ne destruccion, de l'un part ne de l'autre, mès ne fust taunt come les trues durreit; et qe marchauntz de chescun regyoun sauvement porroient en chescun leu passer taunqe à jour sertein assys. Et qe nule vile, citée, ne chastel en le mesme temps ne serroit mieuz vitailée, ne de gentz ne de armure plus fort estoffez, q'ils n'estoyent à cele houre, sure l'ordenaunce de l'endenture faite. Et à ceste covenaunt en la forme susdit leaument tenir Phelip de Valoys jurra sur les seintz Dieu, chescun poynt en les endentures parentre luy et nostre roy ordeiné lealment tenir, et en totes choses de sa part à performer. Et lors quaunt çeo eurount faite, touz les prisouns de grauntz seignours de l'un part et de l'autre estoient deliverez, taunqe à sertein jour de les trues assys en tiele forme, qe si la pées entre les deus realmes se purront tenir come en les endentures plus plenerment est contenuz, qe adonqes touz les avant ditz prisouns de l'un partPage 82
et de l'autre saunz nul raunsoun doner serroyent quitez pur touz jours, et si noun qe les parties ne purroyent acorder ne par sertein jour de les trues prisse la pées aver qe chescun prisoun de l'un part et de l'autre à la gaole se rendroit mesme le jour, là où il primes en prisoun estoit. Lors estoient sire William de Mountagu counte de Salesburi, sire Robert de Offorde counte de Suffolk, et plusours autres deliverez, et vindrent à l'oustel avant qe nostre seignour le roy revint en Engeltere. Touz cestes choses furent ordenez par conseil nostre seignour le roy, par les grauntz seignours del à la mier, qe ne vodroyent plus assenter à la graunt guerre, ne à destruccion de la tere, ne à perdicioun del saunk des Cristiens. Et auxint nostre seignour le roy n'avoit tresor de nule part de sustener et de gagier ses gentz, mès à graunt perde tut par creaunce as marchauntz de faire chevisaunce. Kar il n'avoit rien de son propre tresor demesne, ne des leynes qe luy furent grauntez de la comune d'Engeltere, en eyde de sa guerre meyntener encountre le roy de Fraunce, en tot le temps puisse son darrein passage q'il conquist ses enemys à la bataile en la mier, unqes puisse rienz ne poeit il avoir de son tresor hors de Engeltere par covyne et abettement de maveys treitres qe à son counseil furent jurez.xv
Andreu Aubry, meir.
Adam Lucas et Barthelmeu Denmars, viscountes.
Lors leva la siege à Turneye, qe avoit estée illoqes un quarter de l'an, et de çeo nos gentz firent graunt lamentacion, kar bien quidoyent avoir eu tresor et nobleye pur touz jours, et adonkes estoit tut perdu. Et quaunt le host fust tut deseveriz, nostre roy ove son poeple prist le chemyn tanqe il vint à le cyté de Gaunt, et là sojourna longement, et tint illoqes son parlement, et prist son conseil quey serroit mieutz à faire de sojourner ou de revenir en Engeltere. Kar chescun semeygne il maunda lettres à ses faus gardeins en Engeltere de luy eyder et socurer de son tresor demesne, qe luy fust graunté de tot le comunalté d'Engeltere.
Page 83
Et ses faus treitres, qe à luy furent jurez, luy remanderent lettres assez qe la coilette des dismes d'Engeltere qe à luy furent grauntez ne porroyent estre trové, ne la somme des saks de leyne en tot le realme ne porroyent estre levée, et q'ils n'oserent plus reddour faire pur doute de guerre, et qe le poeple einz vodroyent lever encountre eux avant q'ils vodroient plus doner. Et la coilette de deners q'ils avoyent ressu ne suffit mie as wages, ne pur fees as sergauntz et ministres le roy, ne de aquiter ses dettes q'il mesmes devoit pur despencer de son hostel, as queux ils furent assignez de payer par comaundement le roy mesmes. Et quaunt ensi avoient maundé lour lettres à lour lige seignour le roy, si estoit un de eux q'estoit jurée au roy mieutz voilaunt à luy qe nul des autres, et savoit touz lour privetés et contractes, et privément les mist en escripture et tot lour affaire coment entre eux avoyent ordeinée, et si il mesmes ne vensit privement en Engeltere, riens luy vaudroit plus des lettres à eux maunder; et qe nul homme le savereit de jour ne de nuit tanqe il fust entré en la tour de Loundres, et adonqes meintenaunt maunder aprés le meir del dit cyté, ses sergauntz d'armes demesme, et saunz plus lunge respit qe tost fuissent pris trestouz les serteinz persones, et en la tour à luy amenez, et qe il sanz, il ne fust plus esparniez qe nuls des autres, et le roy troveroit tresor assez de performer sa guerre et ses enemis conquerre. Et quaunt le roy ont entendu les lettres qe luy vindrent, se purpensa qe mieutz serroit à faire, et tauntost maunda après le duke de Braban et Jacob de Artefeld de Flaunders, et plusours autres de son counseil, et les pria mult tendrement ove ses meyns jointz qe ils fuissent bons attornez taunt qe à sa revenue, qe serroit auxint en haste come il le porreit ordeiner. Kar il luy coment de faire un repaire en Engeltere, par la resoun q'il ne vint nul tresor de gager ses gentz de çeo qe luy fust de bon queor graunté. Et quaunt ensy ont dit, il mounta son palfrey et chivacha taunt q'il vint à l'Esclus en Flaundres, et la se mist en nief, et privément vint en Engeltere. Et la nuit prochein après le jour seint Andreu,
Page 84
le roy ove sa companye ariva sus à tere, et ove torchez alumez entra en la tour de Loundres, qe nul y ne savoit de sa venue. Et erraument demaunda après sire Nicholas de la Beche, adonqes constable de la tour et gardein del duke fitz le roy d'Engeltere. Et le southeconstable chaoit as genoilles as piés le roy, et dit, "Monsieur, il est hors de vile." Par quey le roy fust mult corusée; si comaunda tost de overir les hus par tot, si q'il poeit mesmes ver totes les choses qe dedeinz la tour furent. Et quaunt le roy avoit veu totes les choses, si maunda hastiment après Andreu Aubry adonqes meire de Loundres, qe tost vint à luy parler. Et quaunt il vint au roy, chayt as genoils et luy salua, et le roy luy comaunda lever, et sur peine de perdre vie et membre qe hastivement luy feist venir mesme la nuyt saunz nul respit avoir le seignour de Wake, sire Johan de Stonore, sire William de la Pole, sire Johan de Polteneye, sire Richard de Wyleby, mestre Johan de Seint Poul, mestre Henri de Stratforde cosin l'ercheveske de Caunterbury, mestre Michel Wathe, et sire Johan de Thorp. Et touz ceux furent pris mesme la nuyt par le meir et les sergauntz le roy, et amenez al tour de Loundres au roy, et par son comaundement estoyent mis en divers chaumbres chescun par soy, et chescun un gardein pur eux savement garder. Et l'endemein le roy comaunda hastiment quere sire Nicholas de la Beche, adonkes constable de la tour, et sire Johan de Molins, d'amener à luy où q'ils porroyent estre trovez. Et si firent le comaundement le roy, sire Nicholas de la Beche fust trovée et amovée au roy, et sire Johan de Molins se mist à le fuite. Et quaunt tot çeo en out faite, lePage 85
lundi prochein suant après le jour seint Andreu, au soleil levant prist son chemyn ove serteins chivalers, et chivacha taunt qe à Seint Alban, et prist son hostel en l'abbeye et meintenaunt maunda apres l'abbée de la mesoun, et luy comanda de luy mostrer ses habitacions. Et le abbé ne osast contredire, mès overit les hus par tut, et mostra le roy ses estres. Et cela un hus de luy mostrer, q'estoit en un privé auguilette. Et le roy demaunda pur quey ne overist il cele hus. Et l'abbé respondit q'il ne avoit pas les cliefs. "Et qi les aad," fist le roy. Et l'abbée luy redit, qe les choses à sire Johan de Molyns estoient leinz en garde, et q'il avoit les cliefs ovesqe luy. "Par seinte Marie ma dame!" fist le roy, "Jeo prendray mes cliefs." Si fist un febre overir les serures, si entra et trova graunt avoir et graunt plenté de tresor, si le retint tot devers luy. Et de illoqes chivacha en le paiis entour à ses privés amys pur saver noveles de eux, si revint arere à Loundres. Et lors furent attachez sire William de Sharshille, et sire Johan Chardelowe, justices en baunk, sicome ils sistrent en assises à Cauntebrigge, et amenez à le tour de Loundres. Et puiss estoit sire Thomas Ferreres pris, et chescun mis en divers chaumbres. Et puiss après furent touz deseveriz chescun d'autre as divers chasteux, par le counseil sire William de Killesby, ceste à savoir, sire Nicholas de la Beche estoit maundé au chastel de Tikhille, sire Johan de Stonore au chastel de Notingham, sire Johan de Pulteneye au chastel de Somertone, sire William de la Pole au chastel Devyses, sire Richard de Willeby et mestre Henry de Stratforde cosyn l'erchevesqe estoyent maundez au chastel de Corf, sire William de Scharshille au chastel de Kerfilii, mestre Michel de Wathe et sire Thomas Fereres au chastel de Windesore, et les autres, sirePage 86
Johan de Chardelowe, meistre Johan de seint Poul, et sire Johan de Thorp remistrent en prisoun en la tour de Loundres. Et puisse après, le roy ousta son tresorer sire Rogier de Northboruh, evesqe de Cestre, et mist en son lieu un chivaler sire Robert Perninke, et auxint ousta son chaunceler l'evesqe de Chichestre, frere al erchevesqe de Caunterbury, et mist en son lieu un chivaler sire Robert Bouser. Et adonkes le roy jurra son serment qe jammès en son temps ne serreit homme de seinte esglise son tresorer ne chaunceler, ne en autre graunt office qe au roy apent; mès tieles persones qe si jammès de fausine fuissent atteintz, q'il les porreit faire trayner, pendre, et descoler. Et quaunt çeo avoit fait, le roy et la roigne et tote la meynee se remuerent de Loundres taunt qe à Gildeforde, et là tynt il son Nowel. Et de illoqes le roy se remua à Stokebogeys, q'estoit à sire Johan de Molyns, et tint graunt feste illokes ove touz les grauntz du paiis par iij. jours. Et de illoqes se remuaPage 87
taunt qe à Dittone, une tresbele manoir qe estoit au dit sire Johan Molyns, et si trova le roy illoqes armure pur iiijxx. hommes, et de vessel et de tresor graunt plenté, la quele le dit sire Johan de Molyns avoit mis en petiz saks bien liez, et puisse en autre grauntz sakes bien fretté des cordes, et ploungée en un ewe perfounde; kar il entendi bien autre foithe avoir venu à çeo, mès son pensée et son purpos est tot bestornée, kar le roy le retint tot devers luy pur le soen propre. Et quaunt le roy çeo ont fait, si revint à Loundres le meskerdy prochein après le jour de l'an renoef, si comensa son privée conseil. Et fust adonqe ordeinée d'enquerre et de examiner touz les roules des offices le roy, c'este à saver, tresorer, chaunceler, cofrers, justices, viscountes, et de lour clers, taxours parmy Engeltere, coillours des dysmes et des leynes qe au roy fust grauntée à sa guerre performer, et de touz autre ministres, q'ils fuissent prestes ove lour roules à sertein jour assys à Weymouster devant les auditours le roy à çeo assignez de oyer et terminer par tot Engeltere. Et puisse après le meskerdy prochein apres la Typhanie, sire Richard de Willeby, un des chief justice le roy, estut à le barre à Weimouster par deus jours devant sys persones pur respoundre à divers articles dount il fust areint par sire Robert Perninke, sire Robert de Sadingtone, sire William Scot, sire Thomas le Wake, le baroun de Stafford, and sire Johan Darcy, qe luy acouperent de divers pointz q'il avoit fait encountre son lige seignour le roy. Et le dit sire Richard respondi à touz lour demaundez, taunt q'il devint si laas q'il ne poeit plus parler, mès pria eyde come de grace aver un homme de ley à luy assocyé de luy eyder en parlaunce pur luy ayser, et à graunt peyne luy vodreient graunter cele suete. Et quaunt il ne poeit plus endurer à eux respondre, le dit sire Richard se mist en la grace le roy, et fust recomaundé à le tour de Loundres pur attendre le grace le roy. Et mesme la nuit vint si horrible tempest de vent et de pluvie, de foudre et de toneyre, qe treboucha à tere et debrusa la tresbele oevere del esglise des frere menours àPage 88
Loundres. Puisse après le mardi prochein devant la conversion seint Poul, touz les officiers en la court le roy furent oustez et remuez parmy sire William de Killesby, et le dimeinge prochein suant estoit fait le cry parmi Loundres qe chescun haut et bas qe deyvent feauté ou servise au roy duissent estre preste à le tour de Loundres le premere, seconde lundi de qaremme, devant sire Robert Perninke et ses compaignons, justices en eyre assignez. Lors estoient les sertein pointz ordeinez par sire William de Killesby et autres del conseil le roy; adeprimes d'enquere de totes maners oppressions, tortes, damages, grevances, et molestes faitez par chescun ministres le roy, et de lour porte encountre nostre seignour le roy et le comune poeple, c'est à savoir, des justices de l'un baunk et de l'autre, as plées de foreste tenir, des justices à les assises prendre et les gaoles deliverer, et de touz autres justices; auxint de eschetours et sutheschetours, corouners, viscountes, de lour clers et lour ministres; auxint de taxours, suthtaxours, et de lour clercs; de admirals des flotz de navye, et des autres associez à eux; auxint des gardeins, conestables des chasteux pur la pées garder; des pernours et receyvours des leynes, et des autre ajointz à eux; de sessours et vendours des leynes le roy, et autres eydauntz à eux, par divers foith grauntez; des barounes de l'eschekker le roy, et des clerks, auxi bien del chauncerye come de l'eschekker et autres places le roy; des gardeins de forestes vertes, de lour clerks et ministres des forestes, de chases, et de parkes; de coillours des costomes, countreroulers, tronetaries, botillers, et lour assocyez; de les receyvours de deniers le roy en paiis, et de ceux qe lour celent; des seneschals etPage 89
mareschales, et de lour clerks; auxint de gardeins des chivals le roy, et de lour garzouns; des purveours pur le houstel le roy et pur sire E. duke de Cornewaile; des gardeins de gaoles, de choysours traiterousment, de gentz d'armez, hobelers, et archers, et de lour associez; des bailifs en eyre, et de touz autre balifs queux q'ils soyent; auxint de ceux qe leynes ou autre marchaundies sanz costome à nous rendre encountre la defence hors de realme fausement amenerent; de ceux qe meyntenent faus plées en assises, et autres faus quereles; auxint de maufesours dedeinz marchez et autre lieus privée armez bataunt et naveraunt les gentz taunt qe à luy fyn redempcion de eux pristrent; de totes maners oppressions, duresses, et grevances faitz par qi persone qe çeo soit, erchedeakne, dean, official, sequestrers, et lour comissaries et ministres; auxint de ceux qe chaunge fount de monée ou des autre biens, ou ascun autre manere colour de usure; de ceux qe ascun chose fausement par colour de lour office ou autre manere pur lour office faire, ou ove ascun autre parterent, faverent, ou de autres pristrent torcenousement. Et en ycele temps Trailebastoun gist parmy Engeltere, et serteins justices assignez pur soer en chescun countée d'enquere et de examiner touz les pointz avant nomez, et si fu fait graunt duresse au poeple parmy Engeltere. Puisse après un Griffyn de Gales, qe avoit occys le frere et la femme Jacob de Artefelde de Flandres, q'estoit pris et amenez à le tour de Loundres, et mys en fort prisoun, et fiergés de deus fort peire gives et manicles. Et le samedy à soir en le utaves de Paske, si defila ses fers et debrusa la prison et s'enfuit hors de la tour. Et une femme qe out à noun Ibote atte Knolle estoit pris pur le dit Griffyn, feloun le roy, pur çeo qe ele vint à luy chescun jour et luy porta prevement les choses qe il wlt avoir, et si fut ele mis en prisoun pur luy. Et à la quinzeine de la Paske, le roy comensa son general parlement à Weimouster, et le eyre futPage 90
ajornée taunt qe autre foithe qe le parlement fust finy. Et à cele temps sire Hughe d'Audelée, counte de Gloucestre, estoit fait messager de porter en escripture le maundement le roy et son conseil d'Engeltere à le parlement de Fraunce assis à la cyté de Turnaye, qe si Philip de Valois et son counseil vodreient ester et graunter les poyntz compris en l'escripture del maundement le roy d'Engeltere estre à la pées pur touz jours; et si noun, prestement d'estre à la guerre, chescun homme pur soy, saunz nul respit avoir outre le jour des trues pris parentre les deus realmes. Lors vindrent touz les grauntz d'Engeltere à le parlement le roy, mès l'erchevesqe de Caunterbury ne son frere l'evesqe de Chichestre ne l'evesqe de Cestre estoient hors clos du parlement par une semeigne entier, par abettement sire William de Killesby, pur coruse qe fust parentre luy et l'erchevesqe. Puisse après, en le secounde semeigne, le counte de Garenne vint au parlement devant le roy, si trova là sire Robert Perninke, le baroun de Stafforde, sire William Killesby, et sire Johan Darcy, et autres nient covenables de seer en parlement, si comenza sa resoun à dit, "Sire roy, coment va çeo parlement? Jadis ne soleit mye ensy estre; il est tut besturnée en autre manere: car ceux qe deivent estre principals sount forsclos, et autres gentz de mester seent icy en parlement qe ne deivent estre à tiel counseil, mès soulement les peres de la tere qe vous, sire roy, puissent eyder et meintener à nostre graunt bosoigne. Et, sire roy, de çeo devez penser." Et meintenaunt coyemont sire Johan Darcy se leva, et s'en ala hors, et puisse après sire William de Killesby et touz les autres susnomez saunz nul mot parler. Lors se leva le counte d'Aroundel, et dit au roy, "Sire, lessez l'erchevesqe entrer devant vous, et s'il se puet excuser de serteinz pointz qe luy sont mis sure, bien soit; et si noun, nous ordeineroms de çeo qe mieutz soit à faire." Le roy le ottria, et furent mis en escripture xxxij. articles encontre luy, et l'ercheveske les denia touz, et dit q'il n'estoit de rien coupable de nul poynt qe l'em luy mist sure.Page 91
xvj
Johan D'Oxenford, meir.
Le quele Johan morust en mesme l'an, et donk fu fait mair Simond Fraunceis.
Richard de Berking, draper, et Johan de la Rokele, groser, viscuntes.
Et à le feste seint Michel puisse nostre roy fist assembler graunt host de vigerous gentz bien armez, et tote la navye d'Engeltere bien vitaillez, en les parties de Sandwiz, Dovere, et Portesmouthe, si demorra illoqes par deus moys et plus, pur aver entierment son hoste et sa flote des niefs d'Engeltere. Kar luy furent grauntez de tote la tere en ayde de sa gwerre vers ses enemys. Et à le houre Phelip de Valoys avoit assemblée si graunt host par delà de chescun nacioun, Baskeles, Bydouwers, Spaynolfs, Geneveises, et de plusours autre regiouns, qe çeo serroit hidouse chose à dire la somme de gentz q'il avoit assemblé encountre nostre roy Edward, de luy avoir forbarré son aler outre mer, taunt se dota; kar bataile encountre nostre roy ne osast-il doner. Lors nostre roy, quaunt il vit le malice et la graunt felonie de Phelip de Valoys, que si graunt multitude des gentz de divers regions avoit assemblé pur aver destourbé nostre roy de son aler outre mier, lors nostre seignour le roy comaunda hastiment son host, qe taunt fu noble et beale qe unkes nul roy de mounde n'avoit nul tiel, kar il avoit treis cent de grosses niefs, horspris farcostes et galeyes qe vitailes amenerent, la flote des niefs avant passerent à Portesmouthe. Lors siglerent touz avant ove mult graunt joye pur le cost d'Engeltere, et pristrent tut q'ils porroient trover devant eux par tere et par mier taunqe ils vindrent en Bretaigne, un paiis qe l'em apele petit Cornewaille, et illoqes nos gentz arivoyent sure tere, et estoutement se apparailerent pur doner
Page 92
bataile à lour enemis. Cele nuyt mesmes qe nostre seignour le roy ariva sure tere, il vint à un real manoir, q'estoit au seignour de Chalouns, si trova assez de totes choses, mais les gentz du manoir furent touz fuiz, si q'ils n'avoient un soul remys. Et de illoqes le roy et son hoste vindrent à un riche abbée, qe vint ove croisse et mitre encountre luy revestée en genulant, criaunt mercy. Et nostre seignour le roy les graunta sa pées. Et illoqes avoit un tresnoble forest, en la quele nostre seignour le roy avoit son deduit, et chasza par un quinzeine, et prist taunt de preie des divers bestes, qe çeo fu merveille à dire, c'est à savoir, cerf, do et ro, tor volage, sengler, ours, cinge, gopil, et low, fels et fer, si graunt plenté illoqes qe nul numbre ne fust. Et si passa ove son host touz jours avant parmy Bretaigne, taunqe il vint à le cité de Nauntes, mès nul damage ne fiste, kar la dite citée ne vodreit-il pas destrure. Mès se retorna vers Phelip de Valoys par autre chemyn, à sayer si nul bataile osast-il doner en sa tere demeine. Et lors avoit Phelip de Valoys fait debruser touz les pountz en le paiis, qe nostre roy ne son host ne porroient plus près aprocher à luy; mès come coward maunda par ses lettres à nostre roy pur aver truage treis aunz. Et sure çeo duissent xiiij. sages gentz de graunt renoun esluz, c'est à savoir, vij. pur nostre roy et les autre vij. pur Phelip de Valois, pur aler au pape pur attreter pées entre les deus realmes Fraunce et Engeltere, et de acorder. Et si noun, au fyn de les truwes pris d'estre prestement à la guerre de mortel bataile doner pur touz jours. En tiele manere furent les truwes grauntez par ambedeus partz, Fraunce et Engeltere.xvij
Simond Fraunceis, meir.
Page 93
Johan Lovekyn et Richard de Keslingbury, draper, viscountes.
En mesme l'an, nostre roy Edward revint en Engeltere, mais graunt persecucion avoit-il en la mier, et tot son host, de horrible tempest, par quey il perdit plusours de ses niefs et graunt partie de ses gentz. Et l'endemeyn del Hokkeday comensa son parlement à Weimouster, ove touz les grauntz d'Engeltere. Et lors sire Edward fitz le roy, duke de Cornewayle, estoit fait Prince de Gales, par assent de touz les grauntz d'Engeltere.
Page 95
APPENDIX.
I
P. 22. The following account of the severe punishments inflicted on Sir Thomas Weyland and several others of the king's judges, is taken from the Parliamentary Writs, vol. i. p. 14 note, and other authorities.
Proclamation was made that all who had any complaints against the king's justiciars, ministers, or bailiffs, of injuries done to the people whilst he was out of the kingdom, should prefer them in person before the parliament which had been summoned to meet at London on the feast of St. Hilary. In consequence of this proceeding, it appears that the truth of the allegations of the complaints was ascertained in the usual manner, viz. by an inquest of twelve men; and by this inquest Thomas de Weyland, the chief justice of the common bench, was found guilty of having caused a murder to be committed by one of his squires, and of having harboured the murderers. Sir Thomas, who was in subdeacon's orders, and who had also received knighthood, escaped from the officers by whom he was arrested, and fled to the monastery of the Minor Friars at Bury St. Edmund's, where he was allowed to take the habit of the order. After forty days had elapsed, he refused to quit his sanctuary; upon which the laity, probably the sheriff and his posse, besieged the convent and entirely prevented the introduction of any kind of victual. The Friars, yielding to hunger and thirst, abandoned their house, all except three or four veterans, who remained with Weyland. The latter, finding that his frock would not protect him, maxime cum cibaria non haberet, reclothed himself in his secular garb, and surrendered himself to Robert Malet, by whom he was lodged in the Tower of London. Being brought before the council, and arraigned concerning the treasons and felonies which he had committed against the king and the kingdom, he was allowed his choice–either to abide the
Page 96
judgment of the court, or to be adjudged to perpetual imprisonment, or to abjure the king's dominions for evermore. He submitted to the last of these hard conditions; and the port of Dover having been assigned to him, he journeyed thither barefooted, bareheaded, and carrying the cross in his hands and passed the sea; and all his lands, and all his goods and chattels, were seized by the king. And this Thomas, continues the Monk of Dunstable, with great exultation, gave for law, that if any malefactor escaped from the hands of those who had him in custody he should be punished as a prison–breaker. Moreover, he gave for law, that the secular arm should withhold food from every malefactor flying to the church for protection, if after forty days elapsed he should refuse to abjure the kingdom, according to the law. Et postea juxta illud Catonis; Patere legem quam ipse tuleris, ipsemet secundum ipsas leges graviter est punitus. All the other justices of the lower bench, the chief justice of the upper bench, the clerk or master of the rolls, and many others, were thrown into the dungeons of the Tower, from whence they were released upon payment of very large fines. According to a document, intitled Summa Pecuniæ de Justiciariis Regis per Regem extorta (MS. Cott. Claud. E. viii. p. 260), Radulphus de Hengham, chief justice of the upper bench, paid eight thousand pounds; Johannes de Lovetot, three thousand pounds; Willelmus de Brumpton, six thousand pounds; Rogerus de Leycestre, one thousand marks (the three last were the fellows of Thomas de Weyland); Solomon de Roff', chief justice in eyre, four thousand marks; Richardus de Boylond, four thousand marks; Thomas de Sodintone, two thousand marks; Robertus de Preston, one thousand marks–all justices in eyre; Robertus de Litlebury, clerk of the rolls, qui minimus censebatur, one thousand marks; Willelmus de Saham, justice in eyre, though entirely innocent, in quo dolus seu fraus non est inventus, paid three thousand marks to conciliate the king. The heaviest punishment was inflicted upon Adam de Stratton, baron of the exchequer, who was accused or convicted of murder, treason, and sorcery, and, after a long imprisonment in the Tower, was deprived of all his lay–fee, fined thirty–four thousand marks, and despoiled of jewels without number, which were found in his possession, and valued (according to Cott. MS. Faust. A. viii. f. 173) at thirty thousand marks sterling. His manors of Halingbury, Widford, Cowyk, Upton, and Richmond, were granted by the king to the monastery of Bermondsey. (Annals of BerPage 97
mondsey, MS. Harl. 231, f. 45b.) The parliament in which these transactions took place, is stated in the MS. (Claud. E. viii.) to have continued from the morrow of the Circumcision to Sunday next after the feast of St. Valentine. The amerciaments imposed upon the justices are stated with some variations by the different authorities. (See also Stowe's Chron. p. 204.) Weyland's adventures are given from the Chronicle of Dunstaple; and the writer of the latter had a better opportunity of becoming acquainted with the facts than was usually the case with the monastic chroniclers, inasmuch as the prior was present, he having preferred a complaint before the king's council against Ricardus de Boyland. The tradition respecting the application of the fine imposed upon Hengham is well known. These details have been given on account of the very singular illustrations which they afford of the character and jurisprudence of the age. (Chron. de Dunstaple, pp. 575, 579.–Wikes, pp. 118, 120.–Annales Waverlienses, p. 241.–Triveti Annales, p. 266.–MS. Add. 5444, f. 100.) A song on the venality of the judges is printed in Wright's Political Songs, p. 224, published by the Camden Society. This song, Mr. Wright observes, gives a strong picture of the extortions committed at this period of our history upon the weak and defenceless by the magistrates and the officers connected with the courts of law.II
LETTER FROM SIR THOMAS DE TURBERVILLE TO THE PROVOST OF PARIS.
P. 24. It appears that Turberville, who had been taken prisoner by the French, was induced to act as their spy, and was sent over by them to ascertain the state of affairs in England. For the performance of his contract he made homage to the warden of Paris and gave him his two sons as hostages. He was also sworn upon a book, and a deed was also drawn up, by which he was to have land given him to the value of £100. On his arrival at
Page 98
London he pretended that he had escaped from prison, and contrived to acquire much insight into the intentions of Edward in regard to foreign arrangements. At his instigation the king of France made several attempts to invade England. A fleet of 300 vessels being assembled, the enemy first attacked Hythe, where they were defeated with great loss. On the feast of St. Peter ad Vincula (1 Aug.) they landed at Dover, which they burnt in part, and carried off many prisoners; and they repeated their depredations in other parts of the kingdom. (MS. Bibl. Egerton, 650, f. 37. Matthew of Westminster, 424, 425. Wright's Political Songs, p. 278. Hemingford, 58. Chron. Dunst. 642.) The following is a copy of the letter (from the contemporaneous chronicle of Bartholomew de Cotton, MS. Cott. Nero, C. v. f. 240) which he addressed, according to some accounts, to the king of France, detailing the state of England and his own proceedings, which being intercepted, or given up by the emissary whom he employed, he met the punishment due to his treason, and his two sons that were given as hostages to the warden of Paris were beheaded. It is introduced by the following narrative:Eodem anno (1295) quidam miles, nomine Thomas Turbevile, captus a Francis in obsidione de Reims, et detentus in carcere dicti regis Franciæ, venit in Angliam proditiose, se dicens evasisse de carcere dicti regis Franciæ, qui benigne fuit susceptus a domino rege Angliæ et multum honoratus. Sed cum aliquantulum stetisset in curia domini regis Angliæ antedicti, voluit misisse quandam litteram regi Franciæ; nuncius ejusdem eandem domino regi Angliæ detulit, domini sui proditionem seriatim indicans et expandens, quod proditor protendens fugit, sed paulo post captus est. Tenor litteræ suæ proditionis talis fuit.
A noble beer e seynur provost de Paris, syre duz, le seon home lige de ses meyns al boys de viciens, saluz. Cher syre, sachez ke jo suy venuz
Page 99
seyn et hete à la curt le rey de Engletere, e si trovay le rey à Lundres, et muz de noveles me demaunda, dount jo ly diseye le mez ke jo savoye; e sachez ke jo trovay terre de pés en Guales, dunt jo ne osay bayler la chose ke wus bien savez à Morgan. E tachez ke le rey ad byen granté pes et trowes, mès bien vous gardez et avisez ke nules trues ne pernez, si ne seyt à vostre graunt prou; et sachez si nules trues ne feysez graunt prou vus avendreyt, et çeo poez dire à luy haut seignur. E sachez ke jo trovay sire Johan le fiz Thomas à la curt le rey, pur treter pes entre luy et le cunte de Nichole del cunté de Ulvester, mès jeo ne saveye mie uncore coment la bosoyne se prendreyt, kar cete lettre fu fete le jur après ke les cardinaus furent respunduz, dunt jo ne oseye ren tucher de les bosoynes ke vus tuchent. E sachez ke poy de garde i ad vers le su de la mer, e sachez ke Ille de Wycht est saunz garde, e sachez ke le rey maunde en Alemayne ij. cuntes, ij. eveskes, et ij. baruns, pur parler et cunseyler al rey de Alemayne de ceste guerre. Et sachez ke le rey maunde en Gascoyne xx. niefs charges de blée, et de aveyne, et de aveyne, et de autre vitalie, e graunt fuysun de argent; et sire Edmun frere al rey i ira, et le cunte de Nichole, sire Hue le Despenser, le cunte de Warwyk, et muz des autres bone genz; et çeo poez dire à luy haut seygnur. E sachez ke nus quidoms aver assez à fere ver ceus de Escoce, e si ceus de Escoce se relevent contre le rey de Engletere, le Gualeys se releverunt autresi, e çeo ay-jeo ben fest, et Morgan me ad çeo ben encovenauncé. Dunt jeo wus conseyl ke vus hastivement maundez graunz genz en Escoce, kar si lenz poez entrer à tuz jurs gayné le averez, e si vus voylez ke jeo la voyse maundez al rey de Escoce, ke il me trove à tote ma gent à lur custages honurablement, mè ben vus avisez si vus volez ke jo la voyse ou nun; kar jeo crey ke plus vostre pru freye pur attendre à la curt le rey pur espier et enquere noveles ke pur vus seent, qar tut çeo ke jeo pus enquere jeo le vus fray à saver. E me maundez Perot ke fut mon gardeyn en la prison v jeo fu, kar à luy diray chose ke jeo saveray desore enavaunt, et par luy vus enveray les veies ke jeo ben say. E pur Deu vus pri ke vous vous remembrez et avisez de les promesses qe vous moy promistes de par le haut seynur, çeo est à saver, c. livres de terre à moy et à mes heyrs. E pu Deu vous pri de mes enfaunz, ke il ne eent nule defaute taunt come il sunt en vostre garde, de manger ne de beyvre, ne de autre sustenaunce; e pur Deu vous pri ke vous avisez coment jeo pus estre paé ensi, kar jeo ne ay ren ke tut ay perdu ausi bien de ça come de là:Page 100
et ren ne ay de vous, fors vostre graunt leauté, en quey jeo moy afy mut. Hardiement vus afiez en le portur de ceste lettre à curteysie ly facez; e sachez ke en graunt pour suy et en graunt dute, kar acone genz unt suspeciun vers moy, pur çeo ke jeo ay dyt ke jeo suy eschapé hors de la prison. Voz voluntez moy maundez en totes choses. A Deu, qe vous gard.According to the same MS. (f. 241), Thomas de Turberville was taken on the Saturday preceding the feast of St. Michael, and conducted to the Tower of London, and on the Saturday next after the feast of St. Faith received his sentence, and departed the Tower in manner following:-
Il vint de la tur monté un povere hakeney en une cote de raye, et chaucé de blaunche chauces, et sa teste coverte de une houel, et ses peez lyez desuz le ventre del chival, et se meyns lyez devant luy, et furent chivauchaunz entur luy sys turmenturs à la furme del deble atireez et le un mena soen freyn et le hangeman sa chevestre, kar le chival ke luy porta aveyt le un et l'autre, et en tel manere fut il mené de la tur dekes à Weymotter parmy Londres, e feu jugé al des en la graunt sale, et Sire Roger Brabazun luy dona soen jugement ke il fut treyné et pendu, et ke il pendeseyt taunt come ren feut enter de ly, e il feut treyné sur un quir de bof frès de Weymotter al cundut de Lundres, et arere al furches, et là est il pendu de une chene de fer, et pendra taunt ke ren de ly durer pura.
Poem on the Execution of Sir Thomas de Turberville. * [*] This poem is preserved in the Cottonian MS. Caligula A. xviii.; and, as it is written in the same hand as the poem on the siege of Carlaverock which follows it in that volume, and which is the only contemporary copy known to be in existence, Sir Harris Nicolas considered it highly probable that it was composed by the same person. (Chronicle of London p. 195.)101Seignurs e dames, escutez,
De un fort tretur orrez,
Ke aveit purveu une treson,
Thomas Turbelville ot à non.
A Charlys aveit promis,
E juré par seint Denys,
Ke il li freit tute Engletere
Par quentise e treson conquere;
Page 101
E Charles li premist grant don,
Teres e bon garison.
Li treitre à Charlis dit,
Ke il aparillast sanz respit
De bone nefs grande navie,
E de gent forte compaignie,
E il le freit par teus garner,
Où il dussent ariver
En Engleter sodeinement.
Li traiture sanz targement
En Engletere tot se mit,
Au rei sire Edewars vint, e dist
Ke si après li vodera fere
Tutes ses choses deust conquer,
Ke sire Charlis li aveit
A force e à tort tollet;
Issi ke li losengur
De ambepart fu traitur.
Sire Edeward n'entendi mie
Del treitre sa tricherie,
Ke il aveit issi purveu;
A grant honur le ad receu,
E en sa curt fut grant mestre.
Quant ot espie tut son estre,
E le conseil de Engleter,
Li treitre feseit un bref fere
A sire Charlis privément,
Où ariver devissent sa gent
En Engletere, e li pais prendre.
A sire Edeward fu fet entendre,
Cum Deu le out destiné,
E le bref ly fut mustré
E tout ensemble la treson.
Li rei fit prendir cel felon,
Thomas le treitur devantdit,
Ke fist fere cel escrit.
Page 102
A Lundres, par mie la citée,
Treigner le fist en une corée
De une tor envolupé,
Nul autrement ne fut armé,
Haume n'out, ne habergun.
Cillante pierres à graunt fusiun
Aveit-il entur son flanc,
Ke li raerent le sanc;
Apres fu li traiture pendu,
E le alme ala à Belzebub rendu,
Ne aveit autre gareson;
Issi deit l'en servir felon.
En furches peut li malurez,
Des chenes e de fer liez;
Nul home ne l'deit enterrer,
Tant cum son cors porra durer
Iloec pendra cel trichur.
Teu garison ad pur son labour.
Ore purra Charles pur ver
Après li longement garder,
Einz k'il venge pur sa treison
Demander de li garison.
Sire Edeward pur la graunt navye
De France ne dona une aylle.
De vaillante gent fist la mer
De tut part mut ben garder.
De Engleter sunt failliz
Ly Franceys, e sunt honiz;
En la mer grant tens floterent,
Li pors plusurs de eus tuerent,
A Dovere firent sodoinement
Une assaut, e de lur gent
Plus de .v. sent y perdirent,
Unkes plus de prou ne firent.
Ore sunt tuz, jeo quide, neez,
Ou en lur teris retornez,
Page 103
E penduz pur lur servise
Ke Engleter n'aveyent prise.
E çeo Charles lour promist
Si nul de eus revenist.
Sire Charles, bon chevaler,
Lessez ester ton guerrer;
Acordez à ton cosin,
E purpensez de la fin.
Si Engleter guerirez
Jammès ben n'espleyterez;
Ne ne firent voz ancestres
Ke se tindrent si grant mestres,
Ly ducs Lowys, ton parent,
Estace le Moyne ensement,
E autres Franceys assez,
Ke ne sunt pas ici nomez.
Damne Deu Omnipotent
Vous doynt bon acordement. Amen.
Page 9999
End
This is a digitised partial version of an original work in the public domain. See General Conditions of the Anglo-Norman On-Line Hub for rights information concerning this electronic version